• 24/01/2020 12:59 14

Basketball: Ishuri ryo ku Kamonyi riri mu yegukanye irushanwa ry’abatarengeje 17

Ishuri Ecole St Bernadette Kamonyi A (ESB Kamonyi A) ryegukanye igikombe mu irushanwa rya Basketball ry’abatarengeje imyaka 17 mu kiciro cy’abakobwa mu gihe mu kicire cy’abagabo kegukanywe na Elite Lakers yari ihagarariye umujyi wa Kigali.

Umukino waranzwe n’ishyaka

Iri rushanwa ritegurwa na FERWABA n’imwe muri Banki zikorera mu Rwanda, ryasojwe tariki ya 03 Ugushyingo mu karere ka Rubavu.

Iri rushanwa ryazengurutse igihugu, ubwo ryasozwaga, Elite Lakers yari ihagarariye Umujyi wa Kigali yegukanye igikombe itsinze Vision Jeunesse Nouvelle yo mu Ntara y’Uburengerazuba ku mukino wa nyuma amanota 12 kuri 09 [bakina iminota 10].

Elite Lakers yari yageze ku mukino wa nyuma isezereye Rafiki Kids muri 1/2 iyitsinze amanota 11 kuri 06 naho Vision Jeunesse Nouvelle yo yari yasezereye Christian Basketball Team (CBT) iyitsinze amanota 09 kuri 06.

Muri iki kiciro kandi, Christian Basketball Team (CBT) yegukanye umwanya wa 3 itsinze Rafiki Kids amanota 13 kuri 11.

Mu kiciro cy’abakobwa; ESB Kamonyi A yari ihagarariye Intara y’Amajyepfo yegukanye iri rushanwa itsinze Marie Reine Rwaza B yo mu Ntara y’Amajyaruguru amanota 20 kuri 07.

ESB Kamonyi A yari yageze ku mukino wa nyuma isezereye ENDP Karubanda (A) muri 1/2 iyitsinze amanota 07 kuri 04, mu gihe Marie Reine Rwaza B yo yari yasezereye Marie Reine Rwaza (A) iyitsinze amanota 08 kuri 05. Ikipe ya ENDP Karubanda (A) yegukanye umwanya wa 3 itsinze Marie Reine Rwaza (A) ku manota 09 kuri 07.

Visi Perezida wa kabiri wa FERWABA, Nyirishema Richard yatangaje ko bishimira ko iri rushanwa ryagenze nk’uko bari bariteguye.

Richard yagize ati “Twishimira ko uko twari twabiteguye ni ko byabaye, abana barakinnye twabonye impano zitandukanye. Irushanwa rituma umukinnyi agaragaza impano afite.”

Umuhuzabikorwa w’iri rushanwa rya Basketball y’abakina ari 3 kuri 3, Mutokambali Moise yashimye uko iri rushanwa ryagenze, avuga ko mu byo bari bagamije birimo kongera kwandikisha iri rushanwa bitewe n’uko ritanga amanota ku mukinnyi n’igihugu ku buryo u mwaka utaha u Rwanda rwazagira amahirwe yo kuba rwakitabira imwe mu mikino mpuzamahanga.

Iyi mikino ya 3 kuri 3 ikinwa n’abakinnyi bane ariko batatu nibo babanza mu kibuga aho bashoboraga gusimbuza umukinnyi umwe gusa.

Ibihembo byatanzwe, ikipe ya mbere muri buri kiciro yahawe imidari ya zahabu, imipira ibiri yo gukina, inkweto kuri buri mukinnyi ndetse n’amafaranga y’u Rwanda ibihumbi 100, iya kabiri ihabwa imidari ya Silver, imipira ibiri yo gukina ndetse ihabwa ibihumbi 80.

Ikipe ya 3 yahawe imidari ya Bronze, imipira ibiri yo gukina ndetse n’amafaranga ibihumbi 50 naho ikipe ya 4 yahawe umupira wo gukina.

Photos© FERWABA

Jean Paul MUGABE
UMUSEKE.RW

Subiza

Your email address will not be published. Required fields are marked *