• 15/12/2019 12:25 19

Bakame ntazakangisha izina ngo age abanza mu izamu rya As Kigali

Ku wa kabiri tariki 23 Nyakanga As Kigali yakoze imyitozo, umunyezamu mushya NDAYISHIMIYE Eric (bita BAKAME) mu kiganiro n’Umuseke yavuze ko azakora cyane kugira ngo ahabwe umwanya wo kubanza mu kibuga kuko ngo izina afite si ryo rikina.

Bakame avuga ko izina afite atari ryo ryazatuma abanza mu kibuga

Nyuma yo gusinyira As Kigali, Ndayishimiye Eric bakunda kwita Bakame nta ngingo bashyize mu masezerano ko azajya abanza mu izamu nk’umuntu ufite ubunararibonye.

Yagize ati “Mu masezerano mfite ntabwo nashyizemo iyo ngingo kandi burya akazi kange ndakazi ni uguhanganira umwanya ntabwo As Kigali izakinisha umunyezamu ngo ni uko ari BAKAME kuko afite izina, umutoza azakinisha uwo abona ushoboye.”

Bakame avuga ko azabanza mu kibuga kuko yakoresheje imbaraga no kuba azaba abikwiye.

Ati “Ni ‘forme’ (kuba ameze neza) nzagaragaza kugira ngo mbashe kujya mu kibuga.”

As Kigali izakina imikino nyafurika yatomboye KMC yo muri Tanzania, Bakame avuga ko ari amahirwe akurikije urwego As Kigali iriho.

Kuri we avuga ko iyi kipe yo muri kimwe mu gihugu cyo mu Karere u Rwanda rurimo, yanakinnye irushanwa rya Cecafa Kagame Cup 2019 riheruka gutwarwa n’ikipe KCCA yo muri Uganda itsinze AZAM FC 1-0, ngo nta bintu bikomeye yagaragaje ikina.

Ati “Nidushyira hamwe nk’abakinnyi n’Abanyarwanda bakatuba inyuma n’ubuyobozi bwa As Kigali bukadufasha, tuzakora ibishoboka byose KMC tuyikuremo, tuzayisezerera.”

BAKAME yanavuze ko akurikije abakinnyi As Kigali yaguze bishoboka ko yanegukana igikombe cya Championa 2019/ 2020.

Yanavuze ko bimwe mu byamukuye muri As Leopard yo muri Kenya harimo n’ikibazo cy’amikoro iyo kipe ifite ndetse ngo hari amafaranga amwe n’amwe y’agahimbazamusyi atahawe.

Ku bijyanye n’umutoza mushya wa As Kigali, Eric NSHIMIYIMANA Bakame avuga ko ari mwiza, akina umukino usukuye ko nibamushyigikira bazegukana ibikombe byose bikinirwa mu Rwanda.

Ati “Turashaka kwereka abantu ko Igikombe cy’Amahoro As Kigali yatwaye itagitwaye by’impanuka, igiye kuba ikipe y’ibikombe.”

NDAYISHIMIYE Eric bita BAKAME amaze iminsi mu izamu, yaciye muri ATRACO FC yaje gusenyuka, APR FC na RAYON SPORTS, nyuma ajya muri AS LEOPARD na AS KIGALI yamusinyishije muri uyu mwaka.

Bakame ubu arimo arakora cyane ngo agire forme zizatuma umutoza amuhitamo
Bakame yakinnye mu makipe atandukanye ariko nyuma aza kwirukanwa muri Rayon Sports kubera kuvuga amabanga y’ikipe

Jean Paul NKUNDINEZA
UMUSEKE.RW

Subiza

Your email address will not be published. Required fields are marked *