• 08/12/2019 7:08 36

Ba nyiri imodoka zitwara abagenzi bite no ku buzima bw’abashoferi babo- SSP Ndushabandi

Nyuma y’impanuka eshatu zabaye mu minsi ibiri zigahitana abanyarwanda bagera kuri 15, umuvugizi wa Police, ishami rishinzwe umutekano wo mu muhanda, Senior Superintendent JMV Ndushabandi yasabye abafite kampani zitwara abagenzi kujya bazirikana ubuzima bw’abashoferi babo, ntibabananize.

SSP JMV Ndushabandi asaba ba nyiri bus zitwara abagenzi kujya bibuka ko abashoferi bazo bakenera kuruhuka

Kuri uyu wa Kabiri mu masaha ya mu gitondo kare imodoka ya coaster yaguye mu kagari ka Gitarama, Umurenge wa Bwishyura, muri Karongi yica abantu bagera kuri 11.

Mu masaha y’umugoroba mu murenge wa Kabare mu Karere ka Kayonza nayo habaye impanuka ihitana abantu bagera kuri batatu.

Uyu munsi taliki 17, Nyakanga, 2019 mu murenge wa Musambira,Akarere ka Kamonyi naho habereye impanuka yica umunyonzi.

SSP Ndushabandi avuga ko n’ubwo ba nyiri ibinyabiziga baba bagomba kubyitaho kugira ngo bibahe umusaruro, badakwiye kwibagirwa ko abashoferi n’abagenzi ari ab’abagaciro kanini, baba bagomba nabo gutekerezwaho.

Ati: “ Ba nyiri kampani barusheho  kuzirikana abashoferi babo ndetse n’abagenzi batwaye. Nyiri kampani ajye abanza amenye niba umushoferi we yaruhutse bihagije mbere y’uko akora urugendo kugira ngo ataza kugira umunaniro.”

Abajijwe niba asanga ubukangurambaga bwise Gerayo Amahoro buzagera ku ntego yabwo yo kugabanya cyane impanuka mu muhanda  mu gihe nyuma y’igihe gito butangijwe habaye ziriya mpanuka SSP Ndushabandi yavuze ko Gerayo amahoro ubwayo itaca impanuka.

Avuga ko n’ubwo itazazica ariko byibura izatuma abantu batekereza ku bubi bwazo bagatwara bigengesereye.

Ati: “Kuba hari ubukangurambaga mu gushishikariza abantu gukumira impanuka ntibivuze ko ziri burare zirangiye. Kandi impanuka ni ijambo rivuze ko ibintu biba bidateguje.”

Yemeza ko uko biri kose, ubutumwa bwatanzwe muri Gerayo amahoro byatumye impanuka zigabanuka mu rugero runaka.

Ngo iyo butabaho ubu ibintu biba ari bibi kurushaho.

Impanuka yishe abantu 11 muri Karongi ngo ishobora kuba yaratewe n’uko umushoferi yasinziriye

Jean Paul NKUNDINEZA

UMUSEKE.RW

4 Ibitekerezo

  • Afandi rwose murakoze kudutabariza n’aho ubundi ba nyiri company bitaye ku nyungu zabo aho kwita ku bo bazikesha. Ubukangurambaga mu kuvanga abagenzi n’imitwaro nk’isambaza n’ibindi nabyo birabangamye aho umuntu agera aho ajya wagira ngo yavuye kuroba. Asante sana kabisa

  • Pocile-RURA mudufashe rwose n’abanyiri agence zitwara abagenze west (CAPITAL Express na UMUSENGA Express), uretse kuba banafite imodoka zishaje abashoferi babo bagenda bavugira kuri telephone kuva kigali kugera Karongi and vice versa, wamubwira uti ko uvugira kuri telephone utwaye abantu ati uzagure iyawe ujye witwara. Ikibabaje uba ubona abagenzi bo nta n’icyo bibabwiye barabyakiriye mbese wagira ngo kuvugira kuri phone utwaye bus ni uburenganzira bw’umushoferi

  • AFAND ARAKOZE.RURA IZAGENZURE BUS ZIKORA KUMARINYE YO MUMUJYE
    1.INTERNET NTAYO KND BATUBWIYEKO HIYONGEYEHO AMAFARANGA YA FREE INTERNET.

    2. NIBISHOBOKA RIGNE BAZASHYIREHO SOCIETY IRENZE IMWE CG NABIKORERA KUKO ABASHOFERI USANGA BABWIRANABI ABAGENZI KUKOBAZIKO NTAYINDI YATEGA.MURAKOZE.

  • Afandi ndagushimye.nyabuna mukomeze kudutabariza yenda twamira akuka gake n’aho ubundi izi company zaduhinduye ibicuruzwa bimeneka bikayorwa. Izi modoka zibyuka igicuku nazo cyane iziva ahahana imbibi na DRC kuki bagenda bahanza signal ngo polisi iri munzira? aho nta kiba kibyihishe inyuma na shoferi abiziho bityo kwikanga bya hato na hato bikaba byateza impanuka kuko atwara adatekanye? Polisi yacu ndayizeye mukontorore ibijericani n’ibidobo bipfundikiye biba munsi y’intebe abagenzi bicaraho n’inidobo biba mu mifuko cyane imodoka ziva Rusizi rubavu na karongi. murakoze.

Subiza

Your email address will not be published. Required fields are marked *