• 12/12/2019 12:45 20

Azazenguruka u Rwanda n’amaguru mu minsi 100 yo Kwibuka

Umunyarwanda Hyppolite Ntigurirwa warokotse Jenoside yakorewe Abatutsi, aravuga ko kuva tariki ya 15 Mata kugeza ku wa 25 Nyakanga 2019 azakora urugendo rw’iminsi 100 rugamije gukangurira abantu kwimakaza amahoro n’ubumwe.

Hyppolite Ntigurirwa

Hyppolite Ntigurirwa avuka muri karere ka Rusizi, arangije amasomo y’ikiciro cya kabiri cya Kaminuza yabaye umunyamakuru, ubu ni umushakashatsi mu mibanire y’abantu ( sociologue) akabihuza no gukina amakinamico.

Jenoside yakorewe Abatutsi mu 1994, Ntigurirwa yari afite imyaka irindwi.  Yarokokeye mu nkambi y’impunzi ya Nyarushishi, aho yagiye avuye i Mibirizi ku Kiliziya. Se yiciwe aho i Mubilizi n’abandi bo mu muryango we. Ubu ngo agiye kuzazenguruka u Rwanda n’amaguru.

Uru rugendo azakora mu minsi 100 ishushanya iyo Jenoside yakorewe Abatutsi yamaze, azirutangirira mu bice yarokokeyemo.

Kuri iriya tariki ya 15 Mata azatangirira ruriya rugendo kuri Kiliziya ya Mibirizi i Rusizi, ahave yerekeza i Nyarushishi aho yaje guhungira avuye i Mibirizi, akomeze yerekeza mu bindi bice by’u Rwanda.

Aho azaca hose ngo uretse kuzajya aganira n’abaturage ku mahoro, ngo azanakora indi mirimo irimo gutera ibiti by’imbuto n’ibindi.

Azibutsa kandi abo bazaganira ko gutanga ubuzima aho gutanga urupfu n’urwango muri bagenzi babo.

Ati “Nzaganira n’abagenzi tuzahura kandi nzasura abagize ubutwari bwo guhisha Abatutsi muri Jenoside.”

Avuga ko ubuhamya bazamuha azabusakaza ku isi aho afite inshuti hose.

Kuri Hypolite Ntigurirwa amahoro atangirira mu mibanire ya muntu n’uwo baturanye, n’uwo bahuriye mu nzira bataziranye, mubyo yiga cyangwa yigisha abandi, mbere gushaka kubana neza n’umutu uyu kurusha uko mwabanye ejo.

Ati: “ Burya amahoro ni icyo umuntu atanga si icyo ahabwa, buri wese ayatanze yaganza ku isi.”

Uko azajya aca hirya no hino mu Rwanda ni ko ngo azajya asangiza amahanga ubwiza bw’u Rwanda.

Azaca mu nzira nyabagendwa zisanzwe zihuza abantu batuye mu gace runaka n’abatuye mu kandi ariko ngo azanyuzamo ace no mu bibaya, azamuke imisozi, yambuke ibiraro n’ibindi.

Nibwira Ntigurirwa avuga ko azajya arara ku bigo by’amashuri cyangwa ku rusengero.

Uyu muhanga mu mibanire ya muntu n’abantu avuga ko ku ishuri no ku rusengero ariho bantu habiri hagira umuntu uwo ariwe.

Ntigurirwa kandi asaba Abanyarwanda babishaka kuzaza gufatanya nawe mu rugendo rw’amahoro.

Ngo ababona batazabishobora bazandike inyandiko bazimuhe,zizasomwe  mu iserukiramuco y’Ubumuntu iba buri mwaka.

Ntigurirwa  yashinze umuryango witwa Be The Peace Organisation. Uyu muryango ufatanya na Association ‘Ukuri Kuganze’ mu  gukora ibikorwa bihuza urubyiruko n’ababyeyi b’abarokotse cyangwa abagize uruhare muri Jenoside yakorewe Abatutsi.

Ubu mu Karere ka Kayonza mu murenge wa Rukara, iyi miryango n’urubyiruko ruyikomokamo bari kubakirana uturima tw’igikoni bakanatera ibiti by’imbuto.

Ikarita yerekana aho Ntigurirwa azaca

Jean Pierre NIZEYIMANA
UM– USEKE.RW

4 Ibitekerezo

  • ndamushyigikiye

  • courage Muvandimwe NTIGURIRWA turikumwe mururwo rugendo kdi tuzi neza ko ntawe utanga icyo adafite,
    Ababyeyi bawe nabanyamahiro u muvandimwe wawe protais yabitoje abo yareze.
    Turagushyigigikiye kdi tukwifurije gukomera mur’ibibihe twibuka abacu bazize genocide yakorewe abatutsi
    imana izabane nawe.

  • Uru rugendo nararwifuje none mbonye uwo dufatanya.Gusa ntibinkundiye kubera akazi n’inshingano z’urugo.
    Uzagire urugendo rwiza kandi azagenda uba urumuri aho uzanyura hose.

  • Ni byiza cyane Imana izagendane nawe aho uzanyura hose kandi uzagere kucyo wagambiriye utangira uru rugendo, kandi ntanze amahoro ,ugatanga amaho nawe agatanga amahoro kwisi haba amaho twese akatugeraho

Subiza

Your email address will not be published. Required fields are marked *