• 20/01/2020 3:31 38

AU yasubitse kujya kumvikanisha abahanganye muri DRCongo

Umuryango w’Africa yunze ubumwe ntukigiye muri DRCongo kuri uyu wa Mbere taliki 21, Mutarama, 2019 kureba uko wahuza impande zitumvikanye ku byavuye mu matora y’Umukuru w’igihugu aherutse kuba. Uyu muryango ariko ngo uzagena indi taliki uzagirayo mu gihe gito kiri imbere nk’uko byatangajwe na Moussa Faki Mahamat.

Umuryango w’Africa yunze ubumwe wasubitse kujya guhosha ikibazo cyakomotse ku matora muri DRC

Perezida wa Komisiyo y’Umuryango w’Ubumwe bwa Africa Moussa Faki Mahamat yatangaje ko nyuma y’uko Urukiko rutangaje ko Tshisekedi ari we watsinze bidasubirwaho, basubitse urugendo itsinda ry’uyu muryango ryari kugirira muri Congo, ariko bazakomeza guherekeza Congo mu rugendo irimo.

Mu nama idasanzwe yari yatumijwe na Perezida w’u Rwanda Paul Kagame akaba ari nawe uyoboye AU yateranye ku wa Kane w’Icyumweru gishize, abakuru b’ibihugu bayitabiriye bemeranyije ko kuri uyu wa Mbere hari itsinda riyobowe na P.Kagame rizajya guhuza impande zombi muri DRCongo.

Bukeye bw’aho Minisitiri w’ububanyi n’amahanga wa Congo akaba n’umuvugizi wa Guverinoma Lambert Mende yavuze ko Congo idashaka abantu baza kwivanga mu bibazo byayo.

Icyo gihe yavuze ko kuba AU ibuza Urukiko rushinzwe kurengera itegeko nshinga gutangaza burundu ibyavuye mu matora bidakwiriye kuko ngo nta muntu uwo ariwe wese ifite uburenganzira bwo guha amabwiriza Urukiko.

Lambert Mende yagize ati “Sinizeye neza ko Umuryango wa Africa yunze Ubumwe usobanukiwe neza imikorere y’ubutabera bwa Congo-Kinshasa.”

Yongeyeho ko nta gihugu na kimwe ku isi cyakwemera ko ubutabera bwacyo bukoreshwa n’abantu bavuye hanze.

Bukeye bw’aho ku wa Gatandatu, Urukiko rushinzwe kurengera itegeko nshinga rwatangaje bidasubirwaho ko Felix Tshekedi ariwe watorewe kuyobora DRC.

Kuri iki Cyumweru taliki 20, Mutarama, Umuryango w’ubukungu bw’ibihugu byo muri Africa y’Amajyepfo(SADC) watangaje ko ushyigikiye intsinzi ya Félix Tshisekedi kandi ko udashaka ko hari igihugu na kimwe kivanga mu biri kubera muri DRC.

Ngo nihagira ababyivangamo SADC izatabara DRCongo ndetse no mu buryo bwa gisirikare.

Mu masaha y’umugoroba wo kuri iki Cyumweru nibwo ibinyamakuru mpuzamahanga byatangaje ko AU yasubitse kujya muri DRCongo kuri uyu wa mbere, gusa ko bizaba mu gihe kiri imbere.

UM– USEKE.RW

6 Ibitekerezo

  • Oyeed RDC ubundi AU iridumbukiza kuki se bumva babonerana Congo SADC nayo yakoze neza duce abo bampatse ibihugu Bari gukoresha AU

    • African Union ntayibaho.C’est une coquille vide.AU is an empty eggshell.Ubundi se niki AU yakoze kigaragara kuva yabaho?Iriya nzu ikoreramo,yayubakiwe na China!!! Wa mugani dukeneye ubwami bw’Imana.Nibwo bwonyine buzakemura ibibazo isi yikoreye.Yaba AU,yaba UN,zombi ntacyo zimaze.Reports nyinshi zerekana ko FAYULU yatsinze amatora.Ariko kubera ko Kabila afite imbunda,EC na Constitutional Court,ntawamuvuga.Mwibuke ko Parliament na Senate bizayoborwa n’abantu ba Kabila gusa kubera kwiba amatora.Uriya Kisekedi nta jambo azagira.Nawe agiye kwicara asahure igihugu gusa nkuko Kabila yabigenje.DRC izaba nzima umunsi Imana izakuraho abayobozi b’isi,noneho Yesu akaba ariwe uyobora isi yose izaba igihugu kimwe,gituwe n’abantu bumvira Imana gusa nkuko bible ibivuga ahantu henshi.It is a matter of time.Imana ifite Calendar yayo.Niyo mpamvu muli matayo 6 umurongo wa 33,Yesu yasize adusabye “gushaka ubwami bw’Imana”,aho kwizera ubutegetsi bw’abantu.

  • ariko birumvukana!kuberiki näkyä kuvogera igihugu cyabandii bareke ibibera kongo bibe abaturage nibatabaza bazabone bahaguruke en plus Kongo can hold their own problem so stay away from DRC they have their way.

  • Iyo bigeze ku miyoborere mibi ya byinshi mu bihugu bya Africa, ku ihutazwa ry’uburenganzira bwa muntu n’ibwisanzure bw’abaturage n’itangazamakuru, ku iyibwa ry’amatora, ku ihindurwa ry’itegeko nshinga bikorwa n’abategetsi bashaka kubusaziraho, ku ntambara ziyogoza uyu mugabane, ku isahurwa ry’umutungo kamere wa Afrika bikorwa na ba Mpatsibihugu bafatanyije n’abakomisiyoneri babo batsindagiye abanyafrika ngo babayobore, cyangwa ku kibazo cy’urubyiriko rugwa mu nyanja rujya gushakisha imibereho i Burayi, iyo bigeze kuri bene ibyo bibazo byose, African Union ihinduka baringa, amacakubiri ari mu bayigize akigaragaza nk’uko bigenze kuri iki kibazo cya Kongo. Iby’uyu muryango bivuza induru ari uko bari mu nama zishashagirana, zitwara ibya mirenge biva ahanini mu mfashanyo, kuko bene ubwite badashaka kubeshaho uwo muryango witwa ko ari uwabo. Mbega Afrika iteye agahinda!! Izabona abayobozi bazayikura muri izi nzitane z’ibibazo bigenze gute, ko uko abayobozi barushaho kuririmba impinduka ariko urushaho kuyishaka ukayibura? Plus ca change, plus c’est la meme chose.

  • Ubundi se yajyagayo kwenda iki???????
    Buriya se yarijyanyeyo iki???
    Iyi yo yabaye nka tanka yu umukene

  • Iyi AU nayo ni nkaza ONU, imiryango iraho idafite icyo imaze nakimwe. Congo yigeze ibatakira ko ikeneye inkunga yanyu? Byongeye kandi u Rwanda ari natwe tuyoboye AU, twanga cyane abantu batwivangira mubibazo byacu. Ibyo tutifuza kugirirwa kuki twumva twabigirira abandi? aha twigaye cyane rwose.

Subiza

Your email address will not be published. Required fields are marked *