• 15/12/2019 10:43 07

AS Kigali yongeye gusinyisha Eric Nshimiyimana nk’umutoza mukuru

Eric Nshimiyimana yasinye amasezerano y’umwaka umwe ashobora kongerwa, Ubuyobozi bwa As Kigali buvuga ko ahawe amasezerano cyane kugira ngo azatoze imikino ya CAF Confederation CUP.

Nshimiyimana ashyira umukono ku masezerano y’umwaka umwe

Iyi kipe yabonye itike yo kuzakina iyi mikino nyuma yo gutwara Igikombe cy’Amahoro 2019 itsinze Kiyovu Sports.

Inshingano yahawe ngo ni ugufasha ikipe kurenga amajonjora ikazagera nibura mu matsinda.

Shema Fabrice Visi Perezida wa As Kigali ati “CAF isaba ko nibura tugira umutoza ufite uruhushya rwa A, twarebye mu bandi, tureba ibigwi byabo duhitamo Eric Nshimiyimana. Twifuza kurenga amajonjora tukajya mu matsinda kandi naho tukitwara neza.”

Nashimiyimana yatoje As Kigali anayigeza ku mwanya wa kabiri wa Shampiyona, iyi kipe ivuga ko yivuguruye ku buryo mu mikorere yayo yizeza umutoza mushya ko azakora akazi ke atabangamiwe.

Shema ati “Nshimiyimana si umutoza mubi, afite ibigwi, yagejeje As Kigali ku mwanya wa kabiri muri Shampiyona hari byinshi twashingiyeho tumugarura na we arabyemera, icyo dushyize imbere ni ugutsinda kandi tugahagarara neza nk’ikipe y’Umujyi.”

As Kigali yaguze abakinnyi 9 inasinyishije umutoza, ngo iri mu biganiro n’abakinnyi babiri biyongera kuri bariya bashya, ariko inaherutse kwirukana abandi 12.

Eric Nshimiyimana yatangarije Umuseke ko afite inshingano yo gutwara igikombe ngo ni ko kazi umutoza wese aba afite.

Yavuze ko abakinnyi asanze muri As Kigali abazi, akaba agomba kubagerageza kurushaho kugira ngo bazafatanye neza mu kazi ke.

Umunyamabanga Mukuru wa As Kigali aherutse gutangariza Umuseke ko ikipe itazirukana Umutoza Mateso Jean de Dieu n’abamwungirije bayihesheje igikombe cy’Amahoro 2019 ko ahubwo bazashaka undi wujuje ibyangombwa CAF isaba agafatanya na bo.

Nshimiyimana yatoje As Kigali imyaka ibiri kuva muri 2015.

Eric Nshimiyimana akirangiza gusinya amasezerano na AS Kigali
Ku mukino wa APR FC na As Maniema muri CECAFA Kagame Cup, Nshimiyimana yagaragaye ari kumwe n’abakinnyi ba As Kigali
Thomas Higiro( wambaye ingofero) niwe mutoza w’abazamu ba AS Kigali

Jean Paul NKUNDINEZA
UMUSEKE.RW

Subiza

Your email address will not be published. Required fields are marked *