• 14/12/2019 9:12 08

As Kigali yirukanye 12 bayikiniraga barimo MURENGEZI na NDARUSANZE

Mu kiganiro ubuyobozi bwa As Kigali bwagiranye n’Umuseke bwadutangarije ko abakinnyi 12 batazakomezanya n’iyi kipe nyuma y’uko bamwe barangije amasezerano ntibahabwe andi mashya, abandi ikipe ikabona itagumana na bo ikabarekura.

Komezusenge Daniel Umunyamabanga wa As Kigali (hagati mu ifoto) avuga ko abakinnyi 12 batakiri kumwe n’ikipe

Abakinnyi batakiri kumwe na As Kigali ni NDARUSANZE Jean Claude, NGAMA Emmanuel, NININAHAZWE Fabrice, MURENGEZI Rodrigue, NDAYISENGA Fwadi, MUHOZI Fred, NTATE Djumaine, ISHIMWE Kevin, BIZIMANA Djuma, NIZEYIMANA Alphonse, KALANDA Frank na KANAMUGIRE Moses.

Umunyamabanga wa As Kigali, Komezusenge Daniel avuga ko ikipe yari ifite abakinnyi 25, nyuma muri uyu mwaka w’imikino usozwa bongeramo abandi icyenda.

Ati “Twari dufite abakinnyi 25 ariko hari 12 twasezereye uyu munsi, barimo abarangije amasezerano n’abo twasezereye, ariko hari n’abo twongeye amasezerano twagumanye.”

Avuga ku mukinnyi Jean Luk Bakame uri mu bagera ku icyenda ikipe yaguze, Komezusenge yavuze ko mu masezerano bagiranye hatarimo ko azajya abanza mu izamu nubwo afite uburambe, ngo umutoza ni we ureba umukinnyi akamenya umeze neza.

Ku mutoza Mateso Jean de Dieu, ngo nta mpamyabumenyi afite isabwa n’ishyirahamwe ry’Umupira w’Amaguru muri Africa ariko nta n’ubwo azirukanwa kimwe n’abamwungirije ahubwo ngo azashakirwa umutoza wujuje ibisabwa bafatanya.

Yagize ati “Ku rwego rwa CAF baknera umutoza ufite licence A no kuzamura ariko umutoza dufite ntayo afite ariko ntibivuze ko agiye kuva mu ikipe, ahubwo gukorwa ni uko abatoza batwaye igikombe cy’Amahoro tugiye kubashakira umutoza mukuru uzakomezanya na bo.”

Iyi kipe y’Umujyi yavuzweho gushaka kwihuza na Kiyovu Sports, mu gihe bitarabaho ivuga ko mu ntego ifite ari ugutwara igikombe cya Shampiyona cy’umwaka utaha, naho mu irushanwa rya CAF confederation nibura ngo barashaka kuzagera mu matsinda.

AS Kigali kuri uyu wa Gatatu yasinyishije abakinnyi barimo Rusheshangoga Michel, Haruna Niyonzima, Ndayishimiye Eric uzwi nka Bakame, Ishimwe Christian wavuye muri FC Marines, Kalisa Rachid wakinaga muri Kiyovu Sport, Ekandjoum Essombe Arstide Patrick (Union of Douala – Cameroon), Makon Nlogi Thierry (Cotton Sport-Cameroon) Alogo Mba Rick Martel (Manga Sport-Gabon) Fosso Fabrice Raymond (Ums of Loum-Cameroon).

Aba kandi bagombaga kwiyongeraho Songayingabo Shaffy na Rukundo Denis birukanwe muri APR FC.

Umutoza Mateso Jean de Dieu ngo ntazakorwaho ahubwo azashakirwa undi ufite icyangombwa kemewe na CAF

Jean Paul NKUNDINEZA & Yvonne IRADUKUNDA
UMUSEKE.RW

Subiza

Your email address will not be published. Required fields are marked *