• 12/12/2019 6:41 29

Aragisha inama ku kibazo cy’Akarengane, Ubukene n’Amakimbirane mu muryango we

*Uyu musore ni we witaga kuri barumuna be akiga Kaminuza akoresheje ‘Bourse’ ya 25000Frw
*Ubuzima bwabaye bubi arangije Kaminuza, nta kazi afite, n’abo yafashaga bamwe baretse ishuri.

Ni inkuru y’impamo, uwatekereza kugira inama cyangwa ubundi bufasha aha uyu muryango yanyura ku Umuseke tukabahuza.

Yadusabye kudatangaza amazina ye mu itangazamakuru kubera impamvu z’ubuzima bwite. Yatubwiye ikibazo ke mu minota isaga 30 kuri telefoni, atuye mu Karere ka Gicumbi, avuga ko aheruka ubuzima bwiza ari muri Kaminuza nubwo naho Frw 25 000 yabonaga nka ‘bourse’ ku kwezi yayakuragamo ibimutunga, akariha icumbi kandi agafasha abavandimwe be bari mu mashuri mato, ubu bamwe mu bayafashaga bavuye mu ishuri, umuryango wabo urimo amakimbirane aturuka kuri Se.

Umusore yadusabye ko amazina n’isura ye bitagaragara mu nkuru kubera ubuzima bwe bwite

Mu kiganiro yahaye Umuseke, avuga ko Mbere iwabo bari umuryango usa nk’uwifashije ariko kubera Se udashoboka barakena bagera aho guhabwa inka muri gahunda ya Girinka, ubu uwo Se yarayigurishije, kandi ntiyakurikiranwa n’ubuyobozi.

Ati “Mbere twari umuryango wifasheje ariko kubera Papa udashoboka, buracya ukumva yagurishije umurima, yagurishije inka, mbere twarabibonaga turi abana ntitugire icyo dukora, bigeraho turakena dufashwa na Leta.

Twagize amahirwe tubona iyo nka ya Leta tuyifata neza, irakura, iba ingumba. Papa yitwaza ko yanze kurinda, ngo ntibangurirwa, none ngo ubwo arayigurisha, twe turabyanga kubera ko twari twayibonye tuyikennye.”

Uyu musore wiyambaje Umuseke ngo umukorere ubuvugizi ku kibazo kiri mu muryango we, avuga ko igihe yari ku ishuri muri Kaminuza, yakoraga ku Frw 25 000 bamuhaye nka bourse akagura ibiti byo kubaka ikiraro k’iyo nka, agafasha barumuna be akababonera ibikoresho by’ishuri, naho Se nta n’umwe yafashaga ariko agateza umutekano muke mu rugo n’imyaka yeze akayigurisha.

Ati “Igitoki cyannye mu murima nta we ukoraho. Ibyo twarabyihanganiye kubera ko yari umubyeyi wacu nta kundi twari kumugenza. Byarakomeje inka ashaka kuyigurisha, yakanda kuri Mama agatsemba, yakanda kuri twe abana tukamusimbukana, yacunze Mama yagiye gusenga natwe tudahari (ku wa kane taba dufite amasengesho yo kwiyiriza turi Abarokore), inka arayigurisha.”

Iyi nka yagurishijwe n’iyo myitwarire y’uwo mugabo (Se) w’uyu ugisha inama ni bimwe mu biteza amakimbirane akomeye mu muryango n’ubwo bukene, akaba asaba ubuyobozi n’abandi bagira ububasha kugira icyo bakora.

Inka yatanzwe muri Gahunda ya Girinka ikimara kugurishwa byamenyeshejwe Akagari, Gitifu arakurikirana asanga inka yarengeye ku witwa Rusine (Nyacyonga).

Se yazanye akanyana “agaka gasukuma kenda gupfa” ni ko uyu muhungu akagereranya, niko ngo uyu Se yaguze tariki 17 Gicurasi 2018, ako gaka akabariye igiciro ngo ‘ntikarenza Frw 100 000’.

Ati “Iriya nka yagurishije bigeze kuyigera Frw 380 000, ariko ndebye agaciro kayo, kari kugera ku Frw 500 000. Ya nka ntoya yaguzwe, Akagari karayijyanye. Twari tuzi ko iriya nka ya Girinka iri mu kato, nta we uzayigura kuko bitemewe.”

Akagari kamaze gutwara iriya nka, uyu muhungu n’abavandimwe babajije ikiri bukurikireho, ariko ngo hashira amezi atatu Gitifu abaringana, bigera ubwo bandikira Umurenge nk’Umuryango wabo wose.

Gitufu w’Umurenge bandikiye yababwiye ko azagisha inama Akarere, ariko nyuma bahita bamwimura, ubwo basigara babaza Akarere, ntikagira icyo kabamarira.

Ati “Uwaguze inka turaturanye, uwayimurangiye na we turaturanye, iyo tubona ubufasha uwaguze inka yari kuyidusubiza.”

Amakuru bafite (ibivugwa) ngo iriya nka yaguriwe umwe mu bakozi mu Karere ka Gicumbi.

Ikibazo cyabo cyageze ku Ntara, nyuma yo kwandikira Mayor bamumenyesha ko yabarenganyije, kandi n’ibaruwa bamwandikiye yariho amabwiriza ya Girinka bagaragaza ko iyo nka yabo itari kugurishwa bikarangira.

Tariki 4 Ukwakira 2018 ikibazo bakijyanye ku Ntara, na bo bamusubiza ku Karere.

Ikibazo cyageze muri Minisiteri y’Uburinganire n’Iterambere ry’Umuryango (MIGEPROF), na bo tariki 11 Werurwe 2019 bandikira Akarere ka Gicumbi bagasaba gukemura icyo kibazo, ariko n’ubu nticyakemutse.

Uyu muhungu avuga ko “asa n’uwataye umutwe”, kuko ngo ajya kwandikira MIGEPROF yanandikiye MINALOC, anagaragaza inyandiko zose bandikiye ubuyobozi bunyuranye, MINALOC tariki 3 Nyakanga 2019 yandikiye Mayor bamusaba kugaruza iyo nka no gukemura ibibazo biri mu muryango ariko ntibyakozwe.

 

Nta kazi afite kuva arangije Kaminuza muri 2018, ubuzima bwabaye bubi aho kuba bwiza

Agira ati “Nta kazi mfite, nagakura he? Narangije muri Kanama 2018. Abana tuvukana na Primaire bayivuyemo, nabafashaga niga Kaminuza, none ubu umwambaro wabo uracika bikarangira, Mama nta kazi afite. Umwe mu bana tuvukana yavuye mu ishuri burundu kuko yararwaye abura kivurira.”

Uyu ni mushiki we yarwaye akaguru bajya mu Bitaro, bya Byumba babaha ‘transfert’ yo kujya CHUK i Kigali, babura icyo gukora kubera amikoro ya ntayo.

Ati “Kuko abana mu rugo baraborogaga baburaye, nta cyo twari gukora i Kigali. Abana birirwa bagenda, ndakomakoma ngo bagume mu rugo, turumuna twange tubiri nitwo twiga, tubayeho nabi. Ikibazo cyacu ntikigeze kigenzurwa, ahubwo byaje kuba nkaho ari uguhangana hagati yacu na Mayor.”

Ati “Turifuza ko amabaruwa abiri Mayor yandikiwe na Minisiteri ebyiri zitandukanye ahabwa agaciro, ikibazo cyacu kigakurikiranwa.”

Kuri we ngo umuryango wabo uheruka kumera neza yiga muri Kaminuza.

Ati “Niba umwana yaraburaga ikaye narayiguraga, yabura kambambiri nkazigura, ariko ubu siko bimeze bavuye mu ishuri baricara.”

Uyu muhungu ngo kuva arangije kwiga ntaricara iwabo, akora uko ashoboye n’akazi ko guhera ahari imirimo y’ubwubatsi (ikiyedi [aide macon]) arabikora, ariko nta kazi kajyanye n’ibyo yize bya “Mechanical Engineering Production Manufacturing” arabona.

 

Ababyeyi be kuki badatandukana ngo nibura bagire amahoro

Uyu muhungu yabwiye Umuseke ko ibyo gutandukana ari byo byakabyeho, ariko ngo ntibibaho kubera ukwemera “umubyeyi umwe ni Umurokore”.

Ati “Ubu tuvugana mu rugo dufite ikibazo k’itorero, Mama ntashaka ko n’ibi tubivuga, we yumva ko twaryama tugapfa. Mama kumva ko yaburanye, yatandukanye n’umugabo we, yumva ko yaba yaguye, yatandukanye n’Itorero, ariko twe turi bato turatekereza.”

 

Babonye inka ikibazo cy’ubukene n’amakimbirane cyaba kirangiye?

Uyu muhungu avuga ko bafite ikizere ko igihe baba bahawe inka hari igisubizo cyaba kibonetse ku bibazo biri mu muryango we.

Ati “Ikizere turagifite ko amakimbirane yaba akemetse, inka tuyibonye twayishinganisha, byadufasha ko n’ikindi kibazo cy’amakimbirane gihari cyakemuka kubera ko bashyiraho [Ubuyobozi] amabwiriza Umusaza atagomba kurenga, ariko ubu ntacyo twamariwe, twaratereranywe.”

HATANGIMANA Ange Eric
UMUSEKE.RW

2 Ibitekerezo

  • Ngewe ntacyo mvuga ku nka yagurishijwe kubera ko ntazi amategeko areba Girinka.Ndabanza kugaya Mama w’aba bana hamwe n’uyu musore warangije Kaminuza.Kuba “umurokore” utazi neza Bible,ni nko kwiyita Avocat (Lawyer) utazi amategeko.
    Umukristu nyakuri,abanza gushaka umuntu uzi bible akayimwigisha.Kujya mu nsengero bakagucurangira hanyuma ugaha pastor icyacumi ugataha,sibyo kuba umurokore.Bible itegeka Umugabo “gutunga urugo”.Umugore w’umukristu nyakuri,acunga neza urugo,agafasha abana be kubaho,akagira inama umugabo we.Yakanga kumwumva,akiyambaza ubuyobozi.Ikigaragara,nta mbaraga Madame n’Abana bashyize mu gucunga uriya mugabo.Bahugiye mu kujya kwa pastor no kwiyiriza ubusa,umugabo agurisha inka.Kubera ko bali bazi uriya mugabo ko ari igisambo,bagombaga kugurisha iriya nka mbere yuko ayigurisha,cyangwa bakayiragiza ahandi,babifashijwemo n’ubuyobozi.Kuba umukristu ntibisobanura kutita ku bintu bikomeye.Musore,hinduka ube umugabo,ukorane n’ubuyobozi.Shaka umuntu agufashe kwiga neza bible kugirango umenye neza icyo Imana idusaba.Kwiyiriza sibwo bukristu.Umurimo Yesu yasabye abakristu nyabo,ni ukwiga bible ikabahindura,hanyuma bakamwigana,bakajya mu nzira,bagakora umurimo wo kubwiriza nkuko Yohana 14:12 havuga.
    Nubishaka,abahamya ba Yehova b’iwanyu bagufasha kwiga bible ku buntu.Warakuze,haguruka ufashe barumuna bawe,ucunge Papa wawe,wifashishije ubuyobozi.Iyegereze ubuyobozi.Shaka abahamya b’iwanyu bazakugira inama nziza ishingiye kuli bible,kandi bakwigishe bible nawe uyimenye.

    • Sezikeye, toka satan ! Aho urimo umusunikira mu bayehova se ko ahubwo ariho hari hanyuma ‘aho ari. Wikwitwaza wekness n’ibibazo arimo ngo umute mu kanwa k’intare.

      Musore, warangije kaminuza, ariko birasa n’aho ntacyo wizeyo. Nta Production manufacturing ibaho, n’izinaubwabyo rirarbigaragaza ko ntacyo wigaga ahubwo ari icyuka gusa.

      Inama-1: Banza uve muri ako gasitwe k’uburokore n’amadini njye nita ubuyobe, kandi niba bigukundiye uvanemo n’abo b’iwanyu bose
      Inama-2: Va mu rugo rwa so. Urakuze, ndibwira ko urengeje imyaka 24, jya hanze ujye kubaka ubuzima bwawe, kuko hanze y’urugo rwa so niho hari ubuzima.
      Inama-3 : Shyira mu bikorwa inama-1, inama-2 nka emmergency. Bitabaye ibyo mwese muzahenebera nk’umuryango.

      All the best

Subiza

Your email address will not be published. Required fields are marked *