• 08/12/2019 10:35 04

Amategeko mpuzamahanga 14 u Rwanda rwanze kuyemeza kuko hari ibiburamo

  • Muri aya mategeko harimo irivuga ku mfungwa zafatiwe ku urugamba

Komisiyo y’Igihugu Ishinzwe Kuvugurura amategeko igaragaza ko Leta y’u Rwanda yanze kwemeza amategeko mpuzamahanga 14 kuko harimo ibiburamo nk’itegeko ririmo ibivuga ku mfungwa z’Intambara ritagaragaza uko zigomba gufatwa n’aho zafungirwa.

Aimable Havugiyaremye uyobora Komisiyo yo kuvugurura amategeko avuga ko hari amwe mu mategeko agaragaramo icyuho

Ubushakashatsi bwakozwe n’iyi Komisiyo Ishinzwe Kuvugurura Amategeko, bwibanze ku mategeko mpuzamahanga ajyanye n’ibigomba kubahirizwa mu bihe by’intambara.

Ubu bushakashatsi bwagaragaje icyuho muri amwe muri aya mategeko Leta y’u Rwanda yanze no kuyemeza kubera harimo ibigiye biburamo by’ingenzi nko kuba hari agaragaza ibyaha ariko ntiyerekane ibihano byahanishwa uwahamwa na byo.

Muri aya mategeko 14 harimo irifite ingingo zivuga ku birebana n’infungwa zafatiwe ku rugamba ariko rikaba ridasobanura uko zigomba gufatwa n’aho zigomba gufungirwa.

Umukozi muri Ministeri y’Ububanyi n’Amahanga n’Ubutwererane ushinzwe amasezerano mpuzamahanga, Jolly Ntungire avuga ko inzego zigira uruhare mu ishyirwaho ry’amategeko zizicara zikanononsora aya mategeko kugirango harebwe niba leta y’u Rwanda yazayemeza.

Ati “Ibifite akamaro bizagenda bikorwa ntabwo ari ngombwa ngo byose uko bisohotse bihite bishyirwaho umukono, ahagaragaye icyuho cyane cyane ririya tegeko rihana ibyaha, ibyo tuzagenda tubikorana n’izindi nzego zirimo iz’ubutabera.”

Muri ibi biganiro byo kwemeza raporo y’ibyavuye muri buriya bushakashatsi, umuyobozi wa Komisiyo y’Igihugu ishinzwe kuvugurura amategeko, Aimable Havugiyaremye yavuze ko amategeko y’u Rwanda atajya agongana n’amasezerano mpuzamahanga igihugu kiba  kigomba kwemeza.

Ati “Gusa hari ibyuho bimwe na bimwe byagaragajwe…ibyuho biba biri mu masezerano mpuzamahanga ni uko badateganya ibihano bakakubwira ngo ntiwemerewe gukora ibi n’ibi ariko ntibavuge ngo ubikoze ahanishwa iki, iyo hagize ubikora ntitubone ibihano byabyo.”

Gusa hari andi mategeko 17 Leta y’u Rwanda yemeje burundu nyuma yo kuyasuzuma igasanga atabangamiye amategeko y’igihugu kandi akubiyemo ibikenewe byose.

Itegeko nshinga rigaragaza ko amasezerano mpuzamahanga u Rwanda rwashyizeho umukono na yo agira agaciro nk’andi mategeko yose.

Inzobere mu bijyanye n’amategeko zaganiriye kuri ubu bushakashatsi

Dieudonne NSHIMIYIMANA
UMUSEKE.RW

7 Ibitekerezo

  • Nibyiza cyane gusa se uyu mugabo yatubwiye itegeko mpuzamahanga banze gusinya noneho bakarisubizayo rikongera rikigwa noneho tukarisinya nabandi bakisubiraho bakongera kurisinya?

  • Mu Rwanda se hari imfungwa z’intambara zijya zihaba? Mu gihe cy’ubwami uwo wacaga urwuho, waramwicaga ukanamushahura kugira ngo werekane umubare w’abanzi wishe, nicyo kimenyestso cyatumaga ubona umudende, impotore cyangwa ugacana uruti. Intambara yo kuva 1990-1994 yabayemo imfungwa z’intambara zihe? Ndavuga abafashwe mpiri ntibicwe, atari abizanye ku giti cyabo intambara irangiye. Imfungwa y’intambara yafatiwe ku rugamba nzi mu mateka y’u Rwanda ya vuba ni Ngurumbe.

    • Machiavel nzakugabira inka. Aba bayobozi usanga bibereye muri yewe wararaye ntabwo bazi ko ibyo bavuga hari abandi bantu babisoma usanga banabarusha ubwenge. Uyu nanjye ibintu asobanura numvaga harimo kata ntiyumvisha. Kuva muri 1990 nakurikiraga uko nshoboye nta na rimwe mu masezerano ya Arusha nigeze numva harimo guhererekanya imfungwa z’intambara, nubwo byaba byari birimo sinzi aho izo mfungwa zarengeye kuko zimwe twazumvaga kuri Muhabura izindi tukazumva kuri Radio Rwanda ngayo nguko. Ntabwo ari mu Rwanda gusa ariko ni muri Africa yose byerekana imyumvire yacu ikiri hasi munsi ya zeru.Umuntu wese wayamanitse, muri gereza, muri polisi, imfungwa yawe wahambirije amapingu wowe ntayo wambaye warakurikiye amakosi namakosi koko uwo muntu wawe yashyira ubuzima bwawe mu kaga gute kuburyo witabaza isasu? Ibyo njyewe bazagomba kubinsobanurira kuko ntabyumva na busa.

  • Mwanze kurisinya kubera gutinya kuzabazwa ibya Sankara .

    • @Dada Sankara si imfungwa yíntambara kuko nta rugamba yafatiweho, ahubwo ni umunyabyaha wakurikiranwaga núbutabera bwú Rwanda, rero ntukitiranye ibintu, nako nabandi nkawe tuzabazana

  • Niba ari ubushake bucye, niba ari ukutabona amakuru ahagije kunkuru igiye gutangazwa njye bisigaye binyobera ukuntu inkuru zanyu zitaba zuzuye. Nk’ikinyamakuru, amategeko 14 kuyatondagura byari ibintu bigoye?! Wenda abantu babishaka bakisesengurira?! Ahubwo bitumye nkeka kp Leta y’u Rwanda hari amategeko mpuzamahanga yaba ijya yanga gusinya kubera ko iza kw’isonga mukuyica! Ingero ni nk’aho u Rwanda rwivanye mu bijyanye n’iyubahirizwa ry’ingingo zimwe na zimwe za Comission y’uburengqnzira bwa muntu y’ubumwe bwa Africa, rutinya kp bamwe mubanyarwanda bazayiregamo guhohotera uburenganzira bwabo! Ibyo ni ibintu bizwi neza. Mujye muzana inkuru zuzuye.

  • KAREMERA ibyo uvuze nukuri amategeko amwe Leta y’uRwanda yanga kuyasinya kubeko abananiza gahunda zabo

Subiza

Your email address will not be published. Required fields are marked *