• 28/01/2020 8:17 23

Amasomo navomye ku bagore 3 ba rwiyemezamirimo mu Rwanda

Kenshi bavuga ko imishinga ikomeye ihera mu bitekerezo, kuri Karen Bugingo wandika ibitabo, Gasana Mutesi uharanira ko Abanyarwanda basoma ibitabo na Agnes Gyr-Ukunda watangije Edition Bakame, bavuga ko nyuma yo kugira igitekerezo cyo guhanga ikintu hiyongeraho gukora cyane, kudacika intege no guharanira ko akazi kataruta inshuti n’abavandimwe.

Agnes Gyr-Ukunda watangije Edition Bakame na Karen Bugingo wanditse igitabo May name is Life

Ku mugoroba wo kuri uyu wa kane, aba bagore uko ari batatu bahuriye kuri Innovation Village baganiriza urubyiruko ku nzira banyuzemo ngo babe ba rwiyemezamirimo n’uburyo babashije kubibyaza umusaruro ibyo bakora bigakomeza.

Iki kiganiro bahuriyemo cyateguwe n’umuryango Nabu.Org Rwanda uharanira guteza imbere gusoma mu bana bato, mu rwego rwo gukoresha bariya bafite aho bageze mu kwandika ibyo abantu basoma mu Rwanda by’umwihariko b’abagore ngo babe imboni y’abandi bijyanye n’Icyumweru cyahariwe ba Rwiyemezamirimo (Global Entrepreneurship Week) yatangiye tariki 9-16 Ugushyingo aho insanganyamatsiko ari “Abagore ba Rwiyemezamirimo”.

Nabu.Org Rwanda bafite ibitabo 1000 umuntu ashobora gusoma ku buntu, bisaba kujya kuri tefoni (smart phone), cyangwa tablette cyangwa mudasobwa (ufite internet) ukandika Nabu.Org ahari Google Play ubundi ugakurikiza amabwiriza ukaba wabasha kumanura (download) igitabo ushaka gusoma.

Karen Bugingo ni umukobwa uri mu kigero cy’imyaka 25 avuga ko yanditse igitabo yise “My Name is Life” (Izina ryanjye ni Ubuzima tugenekereje mu Kinyarwanda) kugira ngo abashe kubwira abandi ubuzima yanyuzemo arwaye Cancer.

Avuga ko hari byinshi abantu batinya kuvuga byereke ubuzima bwite bwabo, ariko ngo kuri we yanditse mu Cyongereza kugira ngo ubutumwa bwe bugere kure abantu bamenye Cancer banayirinde. Urutse kwandika ibitabo, Karen Bugingo warezwe ari imfubyi nyuma y’uko ababyeyi be bishwe muri Jenoside yakorewe Abatutsi, ubu acuruza imyambaro y’abagore.

Uwari uyiboye ibiganiro yabajije Bugingo icyo abona nk’impamvu ituma abagore batabasha kugera ku ntego zabo mu mishanga igamije inyungu.

Yasubije agira ati “Kutagira uwo urebereraho bishobora kuba kimwe mu byatuma utabasha kugera ku ntego zawe muri ‘business’.”

Karen Bugingo ngo mu kwandika ibitabo arebera cyane ku Mwanditsi witwa Immaculée Ilibagiza.

Kuri Agnes Gyr-Ukunda watangije Edition Bakame, na we ni umugore ukiri muto, avuga ko mu myaka 22 ishize ubwo yayitangizaga ngo abantu baramusekaga bamubaza niba ari ko kazi kazamutunga, ariko ngo ntiyacitse intege kugera ubwo iyi nzu isohora ibitabo by’abana imenyekanye cyane ku rwego izwiho.

Ati “Rwiyemezamirimo agomba kugendera kuri gahunda (organisé) iwe mu rugo bikamuha no gukora neza ku kazi. Iyo udakunda akazi kawe bituma utagira gahunda.”

Avuga ko Edition Bakame ifite abakozi 9 bahoraho kandi ngo na we ntiyicara, arakora cyane, kugira ngo bagere ku ntego azabo. Kuri we ngo gukorana neza n’abakozi, akabizera bituma basohora udutabo tw’abana twiza, dufite amashusho atanga inyigisho kandi hagendewe kuri buri rugero umwana ariho.

Ati “Kwandika igitabo bica mu nzira nyinshi, kugishakira amashusho meza atagora abana kuyumva, kugisoma ugikosora biragora, ariko igitabo gishya iyo gisohotse biba bimeze nk’igihe havutse umwana mu muryango, abantu baba bafite amatsiko yo kumenya ibirimo.”

Kuri Gasana Mutesi umugore ubyaye gatanu, akaba afite ubukangurambaga bwitwa “Gira Igitabo” ndetse acuruza ibitabo mu nzu yitwa “ARISE Bookshop”  avuga ko yabitangije mu Rwanda muri 2009 nyuma y’uko abonye ko gusoma ibitabo bitari mu muco w’Abanyarwanda.

Na we ngo kenshi yagiye ahura n’inzitizi z’uko Abanyarwanda badasoma ariko akagenda azicamo ahindura uburyo bwo kubashishikariza gusoma, haba abasanze mu modoka zitwara abagenzi akabaha ibitabo, cyangwa akabasanga muri gare ahahurira abantu benshi.

Avuga ko kuba rwiyemezamirimo bidakwiye gusigana no kwita ku muryango, n’inshuti kuko ngo usanga ibyo ukora bigerwaho neza bitewe n’uko ubanye neza n’abo mu muryango wawe ndetse n’inshuti.

Clarisse Iradukunda ushinzwe itumanaho muri Nabu.Org Rwanda avuga ko bita kuguteza imbere gusoma no kwandika ibitabo mu bato. Avuga ko bafite isomero kuri Internet (Digital Library) aho buri wese yasoma ibitabo bimworoheyehaba kuri telefoni cyangwa kuri mudasobwa. Bo ngo muri iki cyumweru cya GEW bahisemo abantu bafite umusanzu batanga mu gushakira Abanyarwanda ibyo basoma (Content).

Global Entrepreneurship Week ni igikorwa cy’ubukangurambaga bushishikariza abantu kuba ba rwiyemezamirimo, ubusanzwe hirya no hino ku isi kiba tariki 12-16 Ugushyingo, ariko mu Rwanda muri uyu mwaka cyatangiye tariki 9 Ugushyingo, kikaba kiyobowe n’umuryango IDEA4Africa Rwanda.

Agnes ngo yatangiye Edition Bakame abantu bamuseka ariko ntiyacika intege none ubu ni iznu isohora ibitabo izwi
Karen Bugingo asoma igitabo cye My name is Life ngo ashishikariza abantu kumenya Cancer
Clarisse Iradukunda ushinzwe itumanaho muri Nabu.Org Rwanda
Ubanza ibumoso ni Gasana Mutesi washinze akanayobora Arise Education, Dr.Andrea Grieder ayobora Transpoesis ifasha bana kwandika imivugo, na Ukundamariya Agnes washinze Edition Bakame na Karen Bugingo wanditse My name is Life

Amafoto@HATANGIMANA/UM– USEKE

HATANGIMANA Ange Eric
UM– USEKE.RW

0 Igitekerezo

  • Still ni ugukomeza guteza imbere abagezeyo, birakwiye ko iyo mishinga yamanuka ikagera kubafite impano n’ ibitekerezo basangiza abanyarwandaariko babura ababafasha kwagura ibitekerezo, niba umuntu afite ubushobozi bwo kugira inzu y’ ibitabo ntaba agifashwa aba ageze aho gufasha, hari umwanditsi wo ku kinyamakuru kimwe nzi hano mu Rwanda @umuseke, yandika inkuru z’ uruhererekane zirimo inyigisho nziza zitari iby’ amapfa yateye bakame igasonza ikajya mu kinyaga kwa nyirabukwe.

  • Ibyo uvuze @Umusomyi nanjye nemeranya nawe 100% hari abantu benshi kandi bakiri bato nka Urwibutso na bagenzi be bandika (yaba inkuru, article, …) gusa nibaza impamvu bo batafashwa.
    Hari aho nabonye ngo Bugingo mu gitabo cye ngo yabwiraga abantu no kwirinda cancer gusa njyewe nasomye igitabo cye; ariko ntaho nabibonye icyo nakuyemo mu gitabo cye ni uko anafaranga ntacyo adakora. Gusa na nome ntabwo nabura kuzurikana no gushimira Agnes Gyr-Ukunda washinze Edition Bakame kuko ifite uruhare runini mu gutuma narakunzd gusoma nkiri muto.

Subiza

Your email address will not be published. Required fields are marked *