• 26/01/2020 11:00 12

Amasezerano ku mpaka z’ikoreshwa ry’amazi ya Nile azasinywa mu kwa mbere 2020

Ibihugu bya Misiri, Ethiopia na Sudan byiyemeje kuba byageze ku masezerano ya nyuma ku mpaka zijyanye n’imikoreshereze y’amazi y’Umugezi wa Nile zavutse kubera urugomero runini rwiswe “Grand Ethiopian Renaissance Dam” rwatangiye kubakwa kuri Nile, amasezerano akazagerwaho mu kwezi kwa Mutarama 2020.

Perezida Donald Trump yashyize ifoto kuri Twitter ari kumwe na bariya ba Minisitiri

Leta zunze Ubumwe za America zakiriye inama ya ba Minisitiri b’Ububanyi n’Amahanga ba biriya bihugu mu rwego rwo gukemura impaka z’igihe kirekire zavutse bitewe n’uriya mushinga wa Ethiopia.

Ethiopia imaze kubaka 70% by’urugomero rw’amashanyarazi, kandi ivuga ko nta muntu n’umwe ufite ububasha bwo kuyihagarika, ariko Misiri ikaba itewe impungenge n’ingaruka ruriya rugomero ruzateza zirimo igabanuka ry’amazi akoreshwa mu buhinzi avuye muri Nile, ndetse n’ingano y’amazi azajya muri Sudan.

Umushinga w’urugomero uzatwara miliyari 4$, ni wo munini cyane ku bijyanye n’ingomero z’amashanyarazi akomoka ku mazi muri Africa, ariko wateje uburakari n’impaka.

Itangazo rihuriweho n’impande zose, ryasohowe n’Umunyamabanga wa Leta ushinzwe umutungo muri America, Steven Mnuchin nyuma y’inama rivuga ko “Ba Minisitiri bemeye gukorana kugira ngo amasezerano ya nyuma azasinywe tariki 15 Mutarama, 2020, kandi bazitabira izindi nama ebyiri, i Washington, DC zizaba tariki 9 Ukuboza 2019 na tariki 13 Mutarama zigamije kugenzura no gushyigikira iki gikorwa.”

Bariya bayobozi biyemeko igihe amasezerano ataba asinywe kuri iriya tariki ya 15 Mutarama, 2020, hazabaho gukorana mu buryo bw’amahoro.

Inama yemeje ko Leta zunze Ubumwe za America na Banki y’Isi zizitabira inama ziteganyijwe nk’indorerezi.

UMUSEKE.RW

Subiza

Your email address will not be published. Required fields are marked *