• 13/12/2019 9:20 18

Amalon uzahurira mu gitaramo na Zahara ngo azerekana ko mu Rwanda hari impano

  • Zahara ugarutse gutaramira Abaturarwanda arizeza ibirenze ku byo yakoze ubushize

Umuhanzi Nyarwanda ukizamuka Amalon ugiye guhurira mu gitaramo kizaririmbamo Umuhanzikazi wo muri Afurika y’Epfo uzwi nka Zahara n’umunya-Kenya Nyashinshki, yishimira kuba agiye guhurira mu gitaramo kimwe n’ibi byamamare muri Africa, akavuga ko azitwara neza bishoboka kugira ngo abereke ko mu Rwanda hari impano y’umuziki.

Uyu munsi baganiriye n’itangazamakuru bagaragaza imigabo n’imigambi kuri kiriya gitaramo

Umuhanzikazi wo muri Afurika y’Epfo Zahara uje gutaramira abaturarwanda ku nshuro ya Kabiri, aravuga ko ubwo aheruka yashimishije abitabiriye igitaramo na bo bakabimwereka, akizeza ko azakora ibirenze ibyo yakoze ubushize.

Uyu muhanzi uje mu gitaramo kizwi nka Kigali Jazz Junction, azafatanya n’umuhanzi w’Umunyarwanda Amalon na Nyashinshki wo muri Kenya.

Zahara waherukaga mu Rwanda mu mwaka ushize na bwo muri iki gitaramo kigiye kuba ku nshuro ya kane, avuga ko yishimiye kugaruka i Kigali kuko ubushize yagaragarijwe urugwiro ubwo yataramiraga abaturarwanda.

Ati “Abanyarwanda baranyishimiye nanjye icyo nababwira ni uko nishimiye kuhagaruka abazaza mu gitaramo mfite byinshi byo kubabwira ndetse no kubataramira bihagije ku buryo bazongera bakanyurwa.”

Bulelwa Mkutukana uzwi nka Zahara akomoka muri Afurika y’Epfo yamenyekanye mu ndirimbo nka Loliwe, Mgodi, Imali na Ndize.

Umunyarwanda rukumbi uzaririmba muri kiriya gitaramo, Amalon ukizamuka avuga ko yishimiye guhurira mu gitaramo n’abahanzi bakomeye ku rwego rwa Afurika.

Ati “Ni ibintu bukomeye kuri njye ngomba gukora uko nshoboye nanjye nkabereka ko Abanyarwanda dufite impano z’umuziki.”

Umunyakenya Nyashinski uje mu Rwanda bwa mbere, na we yizeza Abazitabira kiri gitaramo kuzanyurwa kuko azakoresha imbaraga n’ubushobozi bye byose kugira ngo abanezeze.

Nyamari Ongegu wamamaye nka Nyashinski ni umunyakenya azwi mu ndirimbo nka Malaika, Short N Sweet yakoranye na Sauti Sol, Nakupenda yakoranye na Yemi Alade n’izindi.

Bonaventure KUBWIMANA
UMUSEKE.RW

Subiza

Your email address will not be published. Required fields are marked *