• 15/12/2019 9:56 53

Alain wari umutoza mukuru wa Kiyovu yasinye muri Rayon nk’umutoza wungirije

Kirasira Alain wari umutoza Mukuru muri Kiyovu Sports uyu munsi yasinyiye amasezerano y’umwaka umwe yo kuba umutoza wungirije muri Rayon Sports.

Kiarasira asinya amasezerano

Umuvugizi wa Rayon Sports, Jean Paul Nkurunziza yavuze ko Kirasira yari yararangije amasezerano muri Kiyovu Sports bityo ko nta mpungenge z’uko hari izindi nkurikizi zizabaho.

Avuga ko ubuyobozi bwa Rayon Sports bwari bumaze iminsi buri mu biganiro n’uyu mutoza wari umaze umwaka umwe muri Kiyovu Sports.

Umuvugizi wa Rayon Sports avuga ko uyu mutoza bamubengutse kuko yitwaye neza muri Shampiyona y’umupira w’amaguru ya 2018-2019 kuko yarangiye ikipe ye iri ku mwanya wa gatandatu.

Ngo no mu mikino y’igikombe cy’amahoro, uyu mutoza yagejeje ikipe ye ku mukino wa nyuma ariko ntiyatwara igikombe kuko yatsinzwe na AS Kigali bibiri kuri kimwe.

Nkurunziza ati “Ibyo bigwi byose afite ni byo byatumye Rayon Sports imugirira ikizere imuha akazi.”

Uyu muvugizi wa Rayon avuga ko mu masaha make Rayon Sports iza kwerekana umutoza mukuru wa Rayon Sports.

Rayon Sports kandi yanavuze ku makuru avuga ko rutahizamu Jules Ulimwengu ari gushakishwa n’ikipe yo muri Maroc na APR FC.

Nkurunziza ati “Jules ULIMWENGU ni umukinnyi wa Rayon Sports afitiye contrat Rayon Sports y’umwaka umwe kandi ari no ku rutonde rw’abakinnyi bazakina imikino ya Africa Rayon Sports izitabira.”

Avuga ko iriya kipe yo muri Maroc bayatse ibihumbi 200 USD ariko ko nta kipe n’imwe yemeye kuyatanga.

Kirasira mu mukino wa nyuma w’igikombe cy’amahoro

Jean Paul  NKUNDINEZA
UMUSEKE.RW

1 Igitekerezo

  • HORAHO GIKUNDIRO CY’ABANYARWANDA

Subiza

Your email address will not be published. Required fields are marked *