• 20/01/2020 8:10 28

Akamaro k’Inzibutso mu Kwibuka

 Inyandiko ya Dr MUNYANSANGA Olivier/umwarimu muri PIASS

Urwibutso ni ikimenyetso simusiga n’igihamya cy’ukuri kigaragaza koko amateka y’ibyabaye. Urwibutso rutanga amakuru y’ibanze ku byabaye. Ayo makuru agahererekankwa uko ibihe bitandukanye byagiye biha ibindi. Gusura urwibutso bishobora gukorwa umuntu ari wenyine cyangwa ari kumwe n’abandi. Gusura urwibutso bituma wibuka cyangwa wiyibutsa ibyabaye mu mateka. Ayo mateka ndetse akamenkwa n’abatarayabayemo n’abandi bazaza mu bihe by’imbere. Ibyo bigakorwa kugira ngo abantu batibagirwa ndetse bakirinda n’andi makuru menshi aza abasatira agashobora kuba yabayobya akanabibagiza amateka yabo.

Urwibutso rufasha komora ibikomere byatewe n’amateka umuntu yanyuzemo, urwibutso rushobora gusunika n’uwahemutse kuba yasaba imbabazi abo yahemukiye bigatuma abantu bongera kubana birinda icyo ari cyo cyose cyatuma amateka mabi yisubiramo. Urwibutso ni uburyo bumwe bwo kuvugira no gutanga ubutumwa buhoraho abahemukiwe, abarenganijwe cyangwa abishwe bifuza guha abazima uko ibihe bigenda bisimburana.  Inzibutso zikwiriye kubungabungwa kurushaho kugira ngo n’abazaza mu myaka myinshi iri imbere, bazazisure babone amateka uko yagenze.

Ku muntu w’umunyamahanga ugeze mu Rwanda ashobora gutangazwa no kubona inzibutso nyinshi, ariko cyane cyane kubona insengero zimwe zaragizwe inzibutso za Jenoside yakorewe Abatutsi. Kuki insengero nyinshi zagizwe inzibutso? Icyo ni ikibazo abantu bakora ubushakashatsi bari muri za Kaminuza no bindi bigo bagomba kwibazaho, kugira ngo haboneke igisubizo. Ibimenyetso bibitswe muri izo nsengero ziri i Nyamata, i Ntarama, i Nyarubuye, ku Kibuye, i Ruhanga, i Remera Rukoma n’ahandi. Amateka ari muri izo nzibutso araremereye. Urugero umuntu yatanga ni urwibutso rwa Kiliziya y’i Nyange ahiciwe Abatutsi 2 500. Padiri Athanase Seromba wari umuyobozi w’iyo kiliziya, yategetse umushoferi Athanase Nkinamubanzi w’imashini ikora imihanda gusenya urwo rusengero rwarimo abana, abagore  abagabo bari baruhungiyemo. Umushoferi yabajije padiri ati ‘uvugishije ukuri untegeka gusenya uru rusengero?’ Padiri Seromba yaramusubije ati: ‘Twebwe Abahutu turi benshi kandi tuzubaka urundi rusengero.’ Aho hantu i Nyange hashyizwe urwibutso. Birumvikana ko ayo mateka atakwibagirwa cyangwa ngo asibame. Uwo Padiri Seromba yakatiwe igifungo cya Burundu n’Urukiko Mpuzamahanga Mpanabyaha rwashyiriweho u Rwanda i Arusha.

Guhisha amateka, kutavuga ukuri ku byabaye bikomeza urwikekwe hagati y’abavandimwe, abaturanyi n’abafite icyo bahuriyeho cyose. Uko guhisha amateka gushobora kugarura amakimbirane. Gutanga amakuru ku mateka y’ibyabaye ni uburyo bumwe bwo kubaka amahoro arambye hagati y’abantu. Kongera umubare w’inzibutso ni uburyo bundi bwo gukumira amakimbirane ashobora kuza cyangwa kugaruka mu bihe bizaza. Niyo mpamvu Leta n’abikorera bagomba gushyira imbaraga mu bushakashatsi bw’amateka, hakabaho gushyigikira ibikorwa byose bijyanye n’amateka, inzibutso n’inzu ndangamurage.

Kubaka inzibutso ni byiza kuko ni imwe mu ngamba ikomeye ifite imbaraga zo gukiza ihungabana, no komora ibikomere bya Jenocide. Abanyarwanda ntibagomba gutinya inzibutso, amateka, cyangwa kwibuka, ibyo bintu bitatu bifasha sosiyete iyo ari yo yose kumenya uko yitwara. Ihera ku byabaye yibuka, igashyiraho inzitiro cyangwa umurongo w’aho izanyura n’uko izitwara mu bihe biri imbere. Inzibutso kandi zigomba kurindwa no kubungabungwa cyane kuko zigira uruhare rukomeye rwo gukiza ibikomere n’ihungabana mu gihe cyose no mu myaka yose.


2 Ibitekerezo

  • Burya inzibutso ni ngombwa. Ese ko Yesu na Mohammed babayeho imyaka amagana ikaba ishize tukaba tukibibuka, twubaka za Kiriziya, insengero, imisigiti ihenze? Kuki se abacu tutabubakira inzibutso z’agaciro gakomeye… Ntibazazime turiho.

  • Guhisha amateka, kutavuga ukuri ku byabaye bikomeza urwikekwe hagati y’abavandimwe

Subiza

Your email address will not be published. Required fields are marked *