• 26/01/2020 2:46 23

Aimable Twahirwa yasubije Mico The Best ushinja aba ‘judges’ ikimenyane

Ubwo hasozwaga irushanwa rya Primus Guma Guma Super Star ku nshuro ya munani, umuhanzi Mico the Best yabwiye Umuseke.rw  ko abakemurampaka muri ririya rushanwa bagira ikimenyane. Umwe muribo Aimable Twahirwa we avuga ko banyuza ibintu mu mucyo uko bishoboka kose.

Aimable Twahirwa asaba abahanzi kumenya gutangira neza irushanwa bakarirangiza neza

Mico The Best waje ku mwanya wa karindwi mu irushanwa rya Guma Guma yabwiye Umuseke ko atashimishijwe n’umwanya yabonye kubera ko ngo mu kugena uko abahanzi bakurikirana habayemo ikimenyane.

Icyo gihe yavuze ko agiye gukusanya ibimenyetso byerekena ko kugena abahanzi bitanyuze mu mucyo.

Ukuriye abakemurampaka muri Guma Guma witwa Aimable Twahirwa yabwiye Umuseke ko ibyo Mico The Best avuga nta shingiro bifite kuko bo bakora akazi kabo mu mucyo no mu bwisanzure bwose.

Aimable yavuze ko ibyo abahanzi bavuga ahanini nta gitangaza kirimo kuko buri wese aba yifuza umwanya wa mbere.

Avuga ko abahanzi baje mu myanya ya mbere mu irushanwa rya Guma Guma ishize bahurijweho n’abakemurampaka bose.

Ngo basanze bariya bahanzi baritwaye neza muri buri gitaramo bakoze muri Guma Guma iheruka.

Ati “ Hari ikintu abahanzi bagiye bibeshyaho cyane ugasanga wenda muri Gicumbi aririmbye neza abaye nk’ uwa kabiri ariko yajya i Musanze agahita abyica byose akisanga ku mwanya wa kenda.  Uko byahoraga bihindagurika niko bamwe bagiye basigara inyuma.”

Avuga kuri Mico The Best yagize ati “ Mico azagende abanze arebe neza amashusho yose arebe koko niba yarabikoze neza byose.”

Ngo ni byiza kuba yumva ko yarenganye wenda bizamufasha gukusanya ibyo bimenyetso ngo namara kubibona azaze abimwereke ngo bizamushimisha.

Ku by’amarangamutima yaranze abakemurampaka, Aimable Twahirwa yavuze ko ntawayapima ngo amenye aho ahera avuga ko abantu runaka bayagize ubwo bafata umwanzuro.

Ibyo bagendeyeho bahitamo uko abahanzi bakoze neza:

 

Twahirwa Aimable yavuze ko icya mbere bagendeyeho ari imiririmbire ndetse n’ uko umuhanzi yakoranaga n’ abafana be.

Ati “ Hari abagiye bazira kutitwara neza ku rubyiniro nkuko bikwiye. Umuhanzi wese agomba kuba abizi, utabizi yanasobanuza mbere akabimenya. Bamenye ko perfomance itandukanye na video. Ntabwo hariya aba ari umwanya wa Video twe ibintu byose tuba tubibara”.

Yanenze abahanzi bagera ku rubyiniro bakavuga amagambo menshi. Ngo ntabwo uba ari umwanya wo kuganira.

Ngo ntabwo ku rubyiniro ari ahantu ho kuvugira ikiganiro cya Politiki.

Yakomeje avuga ko atazi impamvu uyu mwaka ibintu nk’ ibyo biri kuvugwa cyane kandi irushanwa ryaragenze neza.

Ngo muri rusange abahanzi bitwaye neza nubwo hatabuze bamwe bakoze amakosa.

Abaje ku myanya ya mbere ngo bitwaye neza cyane, birinda amakosa. Aimable Twahirwa yatanze urugero rwa Bruce Melodie.

Uyu muhanzi ngo yirinze gukora amakosa yamusubiza inyuma ahubwo aharanira gukomeza gukora ibintu neza.

Yarangije asaba abahanzi kumenya kwakira ibyatangajwe n’abakemurampaka ahubwo bagaharanira kunoza ibitaragenze neza mu marushanwa azakurikiraho.

Uyu mukobwa ‘ushotorana’ niwe Mico The Best yari yazanye ku rubyiniro
Lion Manzi, Tonzi na Aimable Twahirwa baba bitegereza ibikorwa n’abahanzi byose bakabishingiraho batanga amanota

Bonaventure KUBWIMANA

UM– USEKE.RW

0 Igitekerezo

  • Harya ubundi nkamwe ko nziko ntashuri rya musika mwise ubundi mutanga amanota mukurikije iki?
    Nibura hakabayeho gushyira ibintu en transparency or namanota ntimuyagaragaza ngo tumenye ngo byagetse gutya? Ntabwo kumva ko waririmbye bihagiye kuba juge gusa Guma guma ntaho itaniye na Miss Rwanda byabaye nkiyobera ritagatifu rimwe nutorwa tuba tumuzi muvane umucyo aho.

Subiza

Your email address will not be published. Required fields are marked *