• 19/01/2020 11:45 46

Abize ubuvuzi muri UR batemerewe kuzarangiriza rimwe n’abandi, ngo ni akarengane

Nyuma y’uko hasohotse urutonde rw’abanyeshuri barangije amasomo yabo mu mashami atandukanye ya Kaminuza y’u Rwanda bemerewe kuzitabira umuhango wo guhabwa impamyabumenyi (Graduatiom) ariko ntirugaragareho abize ubuvuzi, bamwe muri aba baratakambira ubuyobozi bukuru bw’igihugu ngo bubarenganure.

Abize ubuvuzi bavuga ko kuba bataremerewe kuzarangiriza rimwe n’abandi ari akarengane

Bivugwa ko hari abanyeshuri bagera kuri 300 bize ubuvuzi ariko batemerewe kuzitabira umuhango wo gusoza amasomo yabo muri Kaminuza y’u Rwanda [uzwi nka Graduation] uzaba tariki ya 08 Ugushyingo.

Bamwe mu banyeshuri bize ubuvuzi batemerewe kuzitabira uriya muhango banditse kuri Twitter basaba abayobozi bakuru b’igihugu barimo Perezida Paul Kagame, Minisitiri w’ubuzima, Dr Diane Gashumba, Minisitiri w’Intebe, Dr Edouard Ngirente babasaba kubarenganura.

Uwitwa Emery Manirambona yagize ati“Birababaje kumva ko abize ubuvuzi bari bageze mu mwaka wa gatandatu {level 6}, batari ku rutonde rw’abemerewe kuzitabira umuhango wo guhabwa impabumenyi, kandi bakaba babimenyeshejwe hasigaye icyumweru kimwe.”

Yanditse ko impamvu asanga bibabaje ari uko bariya banyeshuri bize neza intenganyanyigisho bari bagenewe, nk’uko na bakuru babo bayize.

Asubiza uwitwa Regis  Shema, Manirambona yavuze ko bibabaje kuba abanyeshuri bize ubuvuzi bamaze imyaka 10 biga ariko bakaba babujijwe kuzitabira umuhango wo kurangiza amasomo yabo ku mugaragaro.

Alexis Nshimiyimana we avuga ko baciwe intege no kumva ko batemerewe kuzitabira uriya muhango kandi bari bararangije imyiteguro.

Ati: “ Badusobanurire ikintu gitumye tubuzwa kuzitabira uriya muhango! Ni iki kibiteye ku munota wa nyuma twari twararangije kubyitegura?”

Regis Shema we yasabye InamaNkuru y’uburezi, Minisiteri y’uburezi n’abandi babufite mu nshingano kwinjira mu kibazo kigakemuka bityo abize ubuvuzi nabo bakazitabira umuhango wo kurangiza amasomo yabo ku mugaragaro hamwe n’abandi.

Gerald Hagenimana nawe kuri Twitter yanditse ko ‘bidashyize mu gaciro kubuza abanyeshuri kuzitabira uriya muhango’ kandi baravunitse biga, imyaka itandatu ikaba ishize.

Umwe mu bakozi ba Kaminuza y’u Rwanda ishami rya Huye utashatse ko dutangaza amazina ye avuga ko Inama nkuru y’uburezi, HEC, ari yo yanze ko bariya banyeshuri barangiriza amasomo hamwe na bandi kuko ngo hari ibyo batize.

Yemeza ko ishuri rya Kaminuza y’u Rwanda ryigisha ubuvuzi ryo ryemereye bariya banyeshuri kuzarangiriza rimwe na bandi kuko bize byose bagombaga kwiga nk’uko biteganywa n’integanyanyigisho yigishwa mu ishami rya Kaminuza y’u Rwanda ryigisha ubuvuzi.

Umuseke wavugishije Benjamin Muhizi Kageruka uherutse kuba umuyobozi mukuru wa HEC yabwiye Umunyamakuru kumuha akanya agato akaza guhita amwihamagarira.

Uyu muyobozi wari wabwiye umunyamakuru ko aza kumwihamagarira,  twasohoye iyi nkuru tugitegereje ko agira icyo abivugaho.

Minisitiri w’ubuzima, Diane Gashumba yasubije bariya banyeshuri kuri Twitter ko bagomba gutegereza ku wa Mbere bakazamenyeshwa ibizava mu nama Minisiteri ayoboye izagirana n’ubuyobozi bw’Inama y’amashuri Makuru na Kaminuza (HEC), Minisiteri y’uburezi na Kaminuza y’u Rwanda.

Jean Pierre NIZEYIMANA
UMUSEKE.RW

12 Ibitekerezo

  • Eeeee!Ariko Ibintu bijyanye nu Burezi mu Rwanda birimo akajagari kenshi pee!buri Muyobozi ujemo hariya azana Gahunda ze atitaye ku ngaruka bizagira,Nundi nawe bikagenda uko.nibwo uzasanga Abana bite imyaka 6 muri French bajya Gukora National Exam ikazanwa mu cyongereza.ibyo byamara kumenyerwa ko Abana Biga mu Cyongereza , national exam zaza ngo Zigomba Gukorwa mu Kinyarwanda,ubuse kko Nkiyi Mineduc.ko Iterambere ryi Gihugu Rishingiye ku Burezi barabona igihugu cyacu bakiganisha he kko?eeee….ariko daa ntacyo Biba bibwiye about Bayobozi kko nkabo Bana Bagiye kubuzwa ku graduating kdi Bariteguye,ndategereza ko iyo Abo Bantu Bafata ibyo byemezo byo Guhindura ku Munota wanyuma.habaye harimo nkabana babo,cg Abagore Babo,cg abagabo Babo ntibabikora!gusa ntacyo Ibyo Biba bibawiye,kko Usanga Abana Babo Biga Mu makaminuza yo hanze,!Nta kundi nibigangane.

  • Njye uko mbibona uburezi buri mu bintu byuzuyemo akavuyo n’amanyanga akomeye. None se niba abo banyeshuri babwirwa ko hari ibyo batize kandi barize integanya hagendewe ku nteganyanyigisho yabugenewe ni iki kibabuza gusoza nk’abandi? Ikindi niba hari ibyo batize bivuze ngo abababanjirije bose barangije kwiga bahabwa n’impamyabumenyi kandi ibyo bize bituzuye. Ubwo urumva ubwo burezi buha abantu kujya ku isoko ry’umurimo mu birebana n’ubuzima b’abaturage kandi hari ibyo bagombaga kwiga batize koko butarimo ubugome?

  • HEC igiye kuzarwaza abantu imitima! Umuntu yemera ko byarangiye ari uko yumvise izina rye rihamagawe sinon wakwisanga wizeye ko urangije Kaminuza ukabona bagusohoye wamaze no kwambara gown!

    • Cyakoze uvuze ukuri gusa wakibaza bigenda bityo kuko niba harisabwa umuntu atujuje nabyo byakabaye yarabimenyeshejwe Kare akabikemura. Ikinikibazo gikomeye gikeneye kumenywa na his Excellency. Otherwise bizaguma gutya mpaka

    • Jye aho mbona hari ikibazo ni uko MINEDUC iyoborwa n’abantu batize education, urugero:Dafrose Gahakwa, Vincent Biruta, n’uyu uriho Mutimura Janvier ntabwo aribwo yize.Education nayo ni science nk’izindi zose.Kuki nta narimwe umuganga yayoboye BNR?Ariko igitangaje yayoboye MINEDUC.

  • Nukuri birababaje kumva umuntu yiga medicine imyaka 6 hakurukijwe imfashanyigisho isanzwe ikoreshwa ndetse yewe nabarimu abenshi batarhindutse yarangiza habura icyumweru ngo graduation ibe akamenyeshwa kwatemerewe. Hakwiye kugirigikorwa ninzego bireba ikikibazo kigakemuka rwose.

  • Aho kugirango bazatere urushinge ku ngusho bitewe no kutabiminuzamo baba baretse da amagara araseseka ntayorwa

  • Birababaje!, ese nibwo mukimenya ko MINEDUC ibigangavanga? Muzajye ahitwa i Gitwe mwirebere Kaminuza yaharenganiye igafungirwa amashami ngo nta reme ry’uburezi ifite kandi bizwi byose ibyujuje! Kugeza n’uyu munota abanyeshuri bavuye i Gitwe nta mwanya turahabwa muri UR birirwa badutera igipindi gusaaa cyo kudutesha umwanya ngo ni za catch-up kandi bazi neza ko batazaduha ishuri none mwe muravuga! Aba banyeshuri bihangane ababyeyi babo nabo bihangane rwose mubuzima habaho ibibazo bitunguranye. Ibi byose biterwa n’inzego nyinshi ziba muburezi bwacu ziba zifata ibyemezo zishakiye. HEC, WDA, REB, etc

  • Nonese ngaho nibayifunge nayo!

  • “Umuseke wavugishije Benjamin Muhizi Kageruka uherutse kuba umuyobozi mukuru wa HEC yabwiye Umunyamakuru kumuha akanya agato akaza guhita amwihamagarira.

    Uyu muyobozi wari wabwiye umunyamakuru ko aza kumwihamagarira, twasohoye iyi nkuru tugitegereje ko agira icyo abivugaho.”

    Umuseke nimushaka mwe kwirirwa mumuvugisha kuko twabonye igisubizo cye! Ahahahahahhahahah arasekeje pe!

  • Placer l’home qu’il faut a LA place qu’if faut au moment qu’ I’ll faut

  • ariko Kageruka Benjamin ararengana kuko nibwo akijyayo urumva rero ikibazo si icye ahubwo nicya mutimura yasize
    bamuhe akanya abanze abatekerezeho Benjamin ni umuhanga yanga akavuyo turamuzi

Subiza

Your email address will not be published. Required fields are marked *