• 21/01/2020 10:47 22

Abasaza n’abakecuru bifuza ko ababafite mu nshingano barushaho kubashajisha neza

Abageze mu zabukuru basaba Leta n’abandi babafite mu nshingano kurushaho kubitaho bagasaza neza, nubwo ngo bagira uruhare muri gahunda zimwe na zimwe za Leta, ngo aho bari usanga baratawe n’ababakomokaho bityo ubuzima bukarushaho kubagora.

Ugirashebuja Muvara wo mu murenge wa Rukumberi avuga ko ubuzima abayemo nk’umusaza atari bwiza

Mu Rwanda umwe mu miryango iharanira kubaho neza kw’abakuze witwa ‘NSINDAGIZA’ uvuga ko nta politiki iriho yo kwita ku bageze mu zabukuru, ndetse ngo no kumenya imibare yabo hagendewe ku myaka bafite biragoye.

Mugabowishema Elie ukuriye uyu muryango, mu nama yahuje inzego zitandukanye zita ku burenganzira bwa muntu zisuzuma raporo y’imyanzuro ngishwanama mu kubahiriza uburenganzira bwa muntu (Universal Periodic Review, UPR) u Rwanda rwasabwe gushyira mu bikorwa mu igenzura ryakozwe muri 2015, yavuze ko abakuze batitabwaho uko bikwiye.

Muri iyi nama yabaye tariki 11 Kamena 2018 habura iminsi ine gusa ngo hizihizwe Umunsi mpuzamahanga wahariwe ku kuzirikana ihohotera rikorerwa abantu bageze mu zabukuru uba tariki 15 Kamena, Mugabowishema yabajije uruhare abageze mu zabukuru bo mu Rwanda bagira muri politiki ibagenga, niba iriho.

Yasabye u Rwanda gushyira mu bikorwa ibikubiye mu masezerano mpuzamahanga y’i Madrid yemejwe n’ibihugu 159 mu 2012, akaba abisaba ku bushake bwa buri kimwe kwita ku buzima bw’abageze mu zabukuru, haba mu kubarinda ivangura, kubaha amahirwe yo gukora no kubaha imperekeza z’ikiruhuko k’izabukuru, ndetse no kwita ku buzima bwabo. Ayo masezerano yitwa Madrid International Plan of Action on Ageing (MIPAA).

Mugabowishema yavuze ko mu mabarura akorwa mu Rwanda bagaragazwa imibare y’abato n’abakuru kuva ku mwaka umwe kugeza kuri 49, ngo ibindi byiciro by’imyaka yo hejuru kumenya imibare nyayo y’ababirimo biragoye.

Umuseke waganiriye na bamwe mu bageze mu zabukuru bo mu murenge wa Rukumberi mu Ntara y’Iburasirazuba, bamwe bavuga ko mu nama bemererwa gutanga ibitekerezo ku ngingo ziba zivugwaho, abandi bakavuga ko bakennye cyane kubera ko abana babakomokaho bakabaye babitaho bigendeye gushakira ubuzima ahandi.

Umusaza uri mu kigero cy’imyaka 80 witwa Ugirashebuja Muvara, avuga ko atagira ubwisungane mu kwivuza, kuri we ngo yumva igihe umusaza yaba arara ahantu heza, akarya neza yapfira igihe, urupfu rutamuhuse.

Nyirabikari Vestine w’imyaka 57 avuga ko mu buzima bwabo ufite ubutaka adashoboye guhinga akwiye guhabwa inkunga yo kububyaza umusaruro, naho utabufite agafashwa uko yabona imibereho.

Yumva ko abakuze bakwiye kwiyambazwa bagatanga ibitekerezo ku bakiri bato, by’umwihariko bakabaha inama zabafasha kwitwara neza mu buzima. Gusa, anenga abana b’ubu kuba basiga abo bakomokaho ntibabafashe mu mibereho.

Ati “Umwana ndamufite, yatangiye kugira imyaka 12 ajya i Kigali, hashize igihe mutumaho nti ‘ndarwaye’, araza, hashize amezi atandatu asubirayo, nyuma agarukana inda (atwite). Ari mu rugo n’umwana, kandi namucutsa azongera agende kuko simenya aho aciye.”

Avuga ko abana b’iki gihe badakozwa imirimo ya kera y’icyaro, ngo niyo mpamvu bigira mu mugi. Ati “Umwana wa kera n’iyo yaba yarashatse kure, yagombaga kugira ati ‘Mama” akaza kumusura. Mu rugero rwacu nabaga nturanye n’umusaza nava gutashya nkamuha inkwi, twavomeshaga ibicuma ukabwira umusaza uti ‘zana igicuma nkuzanire amazi’, ariko ubu urabwira umwana ufite n’igare uti ‘wantwariye akajerikani k’amapupa 15’ ati ‘urampa angahe?’.

Ubwo se urabona ari inzira turimo kwerekeramo, aho turi kujya urabona hatari kuturushya?”

Nyirabikari avuga ko abakobwa bakuburiraga abakecuru batitaye ku kuba bafitanye isano, no kugeza ku wo badafite aho bahuriye mu by’amasono yo mu muryango.

Undi mukecuru w’imyaka 78 twaganiriye yadutangarije ko hari ubwo baba bafite n’abana bifashije ariko ngo abakazana babo bakababuza kugira icyo babamarira.

Uyu witwa Mukahigiro Jeanette ati “Erega burya abagore bagira icyo baca ku bagabo, ntabwo nakwemera ko utunga nyoko (nyirabukwe), udatunga mama (nyina w’umugore we) ngo bibeho… Uwakugeza aho ndara ngo urebe.”

Perezida w’u Rwanda, Paul Kagame ubwo yatahaga ku mugaragaro umudugudu w’ikitegererezo mu murenge wa Rongi w’Akarere ka Muhanga tariki 4 Nyakanga 2018, yasabye abaturage kwishakamo ibisubizo igihe bagitegereje ko Leta izabageraho na bo ikabafasha, ariko asaba abana biga amashuri bakayarangiza ku nkunga ya Leta bakabona akazi, guhindukira bagafasha ababyeyi babo n’abavandimwe.

Komiseri muri Komisiyo y’Uburenganzira bwa Muntu, Gahongayire Holairie ubwo yasubizaga Mugabowishema, yavuze ko ibikorerwa abasaza atari impuhwe, ahubwo ari uburenganzira bwabo nk’abantu bagenda batakaza intege.

Ati “Hakwiye kujyaho itsinda (komite) ireba uko abasaza babayeho. Mu mibare bakwiye kujya bagaragazwa nk’ikiciro cyihariye.”

Mukahigiro Jeanette w’imyaka 78 ngo abakazana hari ubwo babuza abagabo babo kwita kuri ba nyina

HATANGIMANA Ange Eric
UM– USEKE.RW

0 Igitekerezo

  • Twese tugomba kubaha abasaza n’abakecuru kuko batubyaye.Tumenye ko natwe ariho tujya.Tubahagurukire muli taxis n’ahandi.Tumenye ko ubuzima ari bugufi.Birababaje kubona dusaza kandi tugapfa.Gusa nanjye nizera ko hazabaho umuzuko ku bantu bose bizera imana.Niwo muti wo gusaza n’urupfu.Igisigaye nukwibaza igihe bizabera.

Subiza

Your email address will not be published. Required fields are marked *