• 12/12/2019 3:28 22

Abaregwa kuyobora imyigaragambyo y’impunzi za Kiziba baburanye

Abahoze mu ngabo muri bo bavuga ko ari abarwayi bo mu mutwe

Abagabo 26 bari mu itsinda ry’abatawe muri yomyi nyuma y’imyigaragambyo y’impunzi z’abanyekongo zo mu nkambi ya Kiziba yabaye muri Gashyantare ishize, uyu munsi baburanishijwe mu mizi nyuma y’igihe kinini urubanza rwabo rusubikwa. Baburaniye mu Rukiko Rwisumbuye rwa Karongi baregwa ibyaha binyuranye, bo babihakana byose.

Abashinjwa imbere y'ubutabera mu mwaka ushize i Muhanga baburana ifungwa n'ifungurwa ry'agateganyo
Abashinjwa imbere y’ubutabera mu mwaka ushize i Muhanga baburana ifungwa n’ifungurwa ry’agateganyo

Iri ni itsinda rya mbere ry’abaregwa kuba bari bayoboye iyi myigaragambyo, itsinda rindi rigizwe n’abari abayobozi b’impunzi bashinjwa kuba indongozi z’iriya myigaragambyo yaguyemo abagera kuri 11 barashwe n’abapolisi b’u Rwanda, igipolisi kigatangaza  ko bitabaraga.

Ubushinjacyaha bubarega; gusagarira, gukubitano gukomeretsa abashinzwe umutekano, kwigomeka, kwigararagambya nta burenganzira no kurwanya ububasha bw’amategeko mu myigaragambyo bakoze kuwa 22 na 23 Gashyantare 2018 i Karongi.

Mu cyumba cy’iburanisha cy’Urukiko uyu munsi harimo abiganjemo impunzi z’abanyekongo zo mu nkambi ya Kiziba baje kumva urubanza rwa bagenzi babo.

Mu gukora biriya byaha umushinjacyaha yareze aba bagabo ko bari bitwaje ibikoresho gakondo byo kurwanisha kandi babikoresheje bakora ibi byaha. Abari mu iburanisha ngo bumve ibi bahise bahigima nk’ababihakana, maze Perezida w’Urukiko abibutsa ko nta ugomba kuvuga mu rukiko adahawe ijambo.

Abaregwa bose bunganiwe n’abunganizi babiri mu by’amategeko, ariko buri wese yasomerwaga ibyaha akaburana ukwe.

Abaregwa biganjemo abahoze ari abarwanyi mu mitwe y’ingabo muri Repubulika ya Demokarasi ya Kongo, harimo kandi babiri bahoze mu ngabo z’u Rwanda basezerewe kubera uburwayi bwo mu kiciro cya gatatu (uburwayi budakomeye).

Aba babiri ni nabo bahereweho, bo biregura bavuga ko barwaye mu mutwe n’igihe iyi myigaragambyo yabaga bari barwaye mu mutwe bityo badakwiye gukurikiranwa.

Ubushinjacyaha bwagaragaje isuzumwa ryabakorewe rikozwe n’umuganga w’ibitaro by’indwara zo mu mutwe i Ndera rigaragaza ko nta burwayi bwo mu mutwe bafite.

Bo bavuze ko batemera iri suzuma kuko uwarikoze ngo ari umusirikare kandi ryagombaga gukorerwa ku bitaro bya CHUK aho gukorerwa i Ndera, gusa Ubushinjacyaha buvuga ko nubwo nta kigaragaza ko umuganga warikoze ari umusirikare ariko anabaye we bitabangamiye amategeko.

Abandi nabo bakomeje gusomerwa ibyaha buri umwe no kwiregura buri wese babifashijwemo n’abunganizi. Biregura bavuga ko inzego z’umutekano ari zo zabasagariye zigakoresha imbaraga z’umurengera mu kubatatanya, ko atari bo basagariye izi nzego.

Iburanisha ry’aba bantu ntabwo ryarangiye kuko haburanye abagera kuri bane gusa abandi ngo urubanza ruzakomeza tariki 13 Werurwe.

Kuri uyu wa gatatu ariko hazaburana abari bagize komite iyoboye izi mpunzi, muri iyi komite niho hagaragaramo n’umugore umwe. Izi mpunzi ziyobowe na Louis Mbangutse Maombi ubu nawe uri mu bafunze aregwa ibi byaha.

Izi mpunzi zigaragambije kubera igabanuka rya 25% ku nkunga yo kuzitunga zahabwaga, kimwe n’iziri ahandi mu Rwanda, zirebererwa na UNHCR.

Kiziba isanzwemo impunzi zibarirwa ku 17 000 z’abanyeCongo, 77% byabo ni abana nk’uko bitangazwa na UNHCR.

Sylvain NGOBOKA
UM– USEKE.RW/Karongi

5 Ibitekerezo

  • Abo babiri bari ingabo zacu se bageze mu nkambi z’abanyekongo gute,ko mperuka hari komisiyo ibashinzwe?!

  • Umva muvandimwe . Niba utanabizi harabademombe benshi munkambi babaye mugisirikare cyurwanda kandi nubu harabasirikare benshi naba police baturuka munkambi zitandukanye gusa abaturuka muya kiziba nibo benshi.

    Aba demombe bamwe nabarwanye kuntambara yokubohora urwanda ariko barabakongomani abandi nabafashije urwanda muri congo ubwo rwarwanagayo muri 1998 ariko bakabaza gutahana ningabo zurwanda. Nyuma babasezereye basanga ababyeyi babo munkambi.

  • @Carine, abo babiri ubaza, babaye ingabo z’u Rwanda bavuye muri iriya nkambi, basezerewe bayisubiramo. Ubwo se icyo utumvamo ni iki ko wigiza nkana?

  • Hari ibyo benshi bakunze kujyaho impaka none ndabona urukiko rubisobanuye. Nukuvugako mungabo no muri police dufitemo impunzi zabanyecongo. Ibi biteye kwibaza ndetse ababishinzwe bakazadusobanurira neza impamvu dukoresha abanyamahanga byongeye impunzi dukuye munkambi.

  • Ariko koko abigaragambije ngo barashinjwa gusagarira police? Ese hapfuye abapolice bangahe? Abakomeretse bo se ni bangahe ko ntabo batweretse? Ahubwo ko impunzi 11 zishwe zizira ubusa. Ibiganza byuzuye amaraso

Subiza

Your email address will not be published. Required fields are marked *