• 08/12/2019 10:30 45

Abanyamaguru bibuke ko priorité atari securité- CP Kabera

Umuvugizi wa Polisi y’u Rwanda  ku rwego rw’igihugu CP John Bosco Kabera asaba abanyamaguru kwirinda kujya bahita bishora mu nzira bagenewe bambukiramo umuhanda.  Abibutsa ko kuba bafite uburenganzira bwo kwambuka mbere( priorité) bitavuze byanze bikunze ko baba utekanye( securité).

Umunyamaguru asabwa kugira amakenga akambuka ari uko abona mu rubavu ashaka kwambukiramo nta kaga yahura nako

CP Kabera avuga ko umunyamaguru aba agomba kugira amakenga, akibuka ko hari ubwo umuntu utwaye nawe ashobora kuba adatuje mu mutwe we bityo ntabone ko hari umunyamaguru wamwambukanye.

Ati: “ Rwose n’abanyamaguru bibuke ko ubuzima bwabo ari ubw’agaciro kanini. Niba ageze kuri zebra crossing ashaka kwambuka, abanze ahagarare arebe iburyo n’ibumoso bityo bizatuma utwaye ikinyabiziga abona ko hari umuntu ushaka kwambuka, amureke yambuke.”

Bamwe mu bashoferi batwara imodoka na za moto babwiye umunyamakuru w’Umuseke ko hari abanyamaguru bishora mu muhanda batabanje gushishoza bikaba byateza impanuka.

Umwe witwa Safari yagize ati: “Buriya abantu ntibazi ukuntu gufata feri bivuna. Iyo wihutaga ukabona umuntu cyangwa iki kindi kirakwinjiranye birakugora cyane guhagagara aho ugeze. Hari igihe ugonga umuntu kuko yinjiye huti huti muri zebra crossing…”

Police  ariko ivuga ko abashoferi nabo bagomba kwibuka gusiga umwanya uhagije hagati y’ikinyabiziga na zebra crossing kugira ngo umunyamaguru yambuye atekanye.

Kuri Twitter Police yanditse iti: “Igihe utwaye hari umuvundo w’ibinyabiziga kirazira guhagarara mu nzira yagenewe kwambukiramo abanyamaguru. Banza urebe ko ikinyabiziga kiri imbere yawe cyagusigiye umwanya uhagije k’uburyo niwigira imbere utari buhagarare mu nzira y’abanyamaguru.”

CP Kabera avuga ko icyagaragaye ari uko hari abatwara ibinyabiziga batazi amategeko y’umuhanda cyangwa se bayica nkana.

Yatanze urugero rwa moto 128 zaraye zifatiwe mu mugi mu ijoro ryakeye kubera kwica amategeko y’umuhanda.

Ngo ubutumwa bwo kwitwararika mu muhanda bureba impande zose ziwukoresha kuko iyo hagize rumwe murizo rutaba maso bigira ingaruka ku bawukoresha bose.

Polisi isaba abatwara ibinyabiziga kujya basiga umwanya uhagije kugira ngo abanyamaguru bambuke batekanye
Police yafashe moto nyinshi muri iri joro ngo ntizakurikije amategeko y’umuhanda

Jean Pierre NIZEYIMANA

UMUSEKE.RW

4 Ibitekerezo

  • Hari akantu nakwisabira; hari Zebra crossing ziteye inkeke; reba iriya iri imbere neza ya CHIC umanuka ukata usatira Downtown cyangwa iriya iri i Butare imbere ya Hotel Credo ku ikorosi rimanuka riva mu cyarabu. Hariya hantu hombi kuhambuka n’amaguru ni ikizame. Imbere ya CHIC ho hakwiye dos d’ane.

  • Ntekereza ko Police ikwiye gushyira ingufu mu kwigisha abanyamaguru kuko abatwara ibinyabiziga benshi batangiye kubyumva, cyane cyane ko bacibwa n’ibihano, rimwe na rimwe n’amakosa yakozwe n’abanyamaguru kandi bo barahawe ubudahangarwa!

    Nk’urugero ni nko kubona ahari bya byapa biyobora imodoka abanyamaguru bo wagira ngo ntibibareba, bakambuka igihe bashakiye, umwe umwe, ukibaza igihe ikinyabiziga cyazagendera ugashoberwa.

    Ubundi ikinyabiziga cyigahagarara kuri zebra crossing hahagaze abantu 4, hakambuka umwe, yarangiza hakambuka uwa kabiri gutyo gutyo! Ubwo abahoberana bambuka, abagenda baganira n’abari kuri phone ntibagira umubare!

    Kandi ibyo byose abapolisi baba babireba ntacyo bibabwiye kuko abo bantu nta bihano bacibwa ariko bakibagirwa ko aribo ba mbere babigwaho ingaruka za mbere.

    Please dukome urusyo n’ingasire kuko kimwe ntacyo cyatumarira niba dushaka ko impanuka zizagabanuka nk’uko tubyifuza twese.

  • Agahomamunwa.com Ikibazo ntabwo kiri kubanyamaguru kiri kuri abo bashoferi..Kuki buri gihe iby’iwacu tubitondagura macuri? Niba dushaka ko Kigali iba umujyi green ibi mubihuza gute? Guhana abambukira ahatemewe ariko ahemewe umunyamaguru ahafite uburenganzira busesuye rwose. Kera muri 1992 hariya hepfo uvuye kuri péage hari amatara, ntategereza umwanya w’umunyamaguru uzamo ndatambuka bamwe bari bagiye kungonga abandi bantuka ibitutsi byinshi cyane bamwe banancira mu maso, Njyewe icyo gihe nari mu burenganzira bwanjye. Ikindi amategeko agenga ibinyabiziga n’abayobozi bajye bayubahiriza kuko uwo muhanda ni uwa leta ntabwo ari uwabo iyo batari mu nshingano zakazi. Ugashyira imodoka yawe ahantu ngo vanaho kuko umwanya ari uwa kanaka. Ninde urusha undi munyarwanda uburenganzira?

    • @Rugero
      Hari akantu nakwibwirira; wari uziko buriya mu muhanda hari ubwo hakora agatuza? Ibuka uko igare riri ahamanuka ryirukankana abanyamaguru! Hari ubwo moto zisanga abanyamaguru kuri bordure bagahunga, imodoka nayo ikitambika moto zigakwira imishwaro, Coaster nayo ikinjira mu muhanda itunguranye yazamuye intugu amavatiri agakuba amapine, ikamyo urugero iyikoreye ibitaka yarata igihembe utundi twose tukayihunga! Rukururana nazo nuko zigatuma izindi zihinda umushyitsi! Mperutse kubona caterpillar imwe ipakira amakamyo iri gukimbagira nta bwoba mu muhanda buri wese agakizwa n’amapine. Ariko ibi ntibibujije ko umukarani ucunga ingorofani yikoreye urugi rwa metallique cg amakaziye na we atambikamo moto n’imodoka zidakanganye zikibwiriza zigashyira amaboko nako amapine hejuru!

Subiza

Your email address will not be published. Required fields are marked *