• 11/12/2019 10:05 00

Abakozi ba MINIJUST bakanguriwe kugana Isoko ry’Imari n’imigabane

Abakozi ba Minisiteri y’Ubutabera (MINIJUST) basobanuriwe uburyo bwo kwizigamira no gushora imari binyuze ku isoko ry’imari n’imigabane, ubu bukangurambaga ku kwizigamira kandi bateganyiriza ejo hazaza heza bwakozwe n’Ikigo gishinzwe kugenzura Isoko ry’Imari n’Imigabane (CMA).

Basabwe kuzigamirea ejo haza hamwe n’imiryango yabo binyuze mu isoko ry’Imari n’Imigabane mu Rwanda

Umuyobozi Mukuru w’agateganyo w’Ikigo gishinzwe kugenzura Isoko ry’Imari n’Imigabane mu Rwanda (CMA), Eric Bundugu yatangarije abitabiriye iki kiganiro ko CMA ifite gahunda yo kurushaho gusobanurira no kwereka amahirwe Abanyarwanda uko barushaho kuzigama no gushora imari mu gihe kirambye.

Yagize ati “Isoko ry’Imari n’Imigabane riha amahirwe menshi Abanyarwanda bo mu ngeri zitandukanye mu kurushaho kwizigamira by’igihe kirekire, haba mu bigo by’imari ku giti cyabyo cyangwa binyuze mu mpapuro mpeshwamwenda za Leta y’u Rwanda n’ahandi.”

Avuga ko CMA Rwanda iterwa ishema no gukomeza gusobanurira no kwigisha Abanyarwanda uburyo bwo gushora imari no kwizigamira nk’inkingi ya mwamba y’ejo heza kuri buri wese.

Ati “Turabasaba gutangira kwizigamira hakiri kare birimo no guteganyiriza igihe kizaza, mubyaza umusaruro amahirwe ari ku isoko ry’imari n’imigabane hano mu Rwanda.”

Umunyamabanga wa Leta ushinzwe itegeko Nshinga n’andi mategeko, Me Evode Uwizeyimana na we witabiriye ibiganiro yahamagariye abakozi ba Minisiteri y’Ubutabera ko mu byo bakora bagomba kuzirikana umuco wo kwizigamira no kuzigamira imiryango yabo.

Yagize ati “Ikigo k’Imari n’Imigabane ndetse n’ibindi bigo, bifite serivisi zitandukanye zihamagarira Abanyarwanda kwitoza kwizigamira no gushora imari mu buryo butandukanye kandi butanga umusaruro. Ndahamya ko uburyo bufatika kandi bwiza kuri mwe no kuri buri Munyarwanda ari ukwizigamira no kubyaza umusaruro amahirwe aboneka muri ibyo bigo by’imari byo mu Rwanda.”

Yababwiye ko kwizigamira bikorwa mbere y’ibindi byose umuntu ateganya gukora bidakenewe cyane.

Ati “Bijya bibaho ko buri muntu akoresha amafaranga kandi menshi mu bintu bidakenewe, kugura ibintu bihenze cyane, ariko nyamara nkamwe siko byakabaye bigenda, ahubwo ibyo byakabaye nyuma yo kwizigamira muteganyiriza abana banyu n’iterambere ry’igihugu muri rusange.”

CMA ni ikigo k’Igihugu cyashyiriweho Abanyarwanda kibaba gifite inshingano zo kugenzura no guteza imbere ibigo by’amasoko y’imari n’imigabane, hamwe no gushishikariza Abanyarwanda umuco wo kwizigamira hakiri kare.

Abakozi ba Minisiteri y’Ubutabera bakurikiye ikiganiro ku kwizigama by’igihe kirekire
Kuzigama by’igihe kirekire binyuze mu isoko ry’Imari n’Imigabane bitanga umusanzu mu guteza imbere igihugu

UMUSEKE.RW

Subiza

Your email address will not be published. Required fields are marked *