• 14/12/2019 9:48 22

Abakozi 2 b’Akarere baregwa ruswa bakatiwe imyaka 3 n’ihazabu y’ibihumbi 800Frw

Ribanje Jean Pierre na Kabalisa Emmanuel bakoreraga akarere ka Ruhango, Urukiko Rukuru, Urugereko rwa Nyanza rwabakatiye igifungo cy’Imyaka itatu runategeka no gutanga ihazabu y’ibihumbi 800 Frw  nyuma yo gutesha agaciro ubujurire bwabo ku byaha birimo ibyo  kwakira Ruswa bahamijwe n’urukiko Rwisumbuye rwa Muhanga.

Ku rukiko rukuru, urugereko rwa Nyanza, ahabereye isomwa ry’imyanzuro

Mu mpera z’Icyumweru gishize Urukiko Rukuru, urugereko rukorera i Nyanza rwasabye ko Kabalisa Emmanuel Umuyobozi w’Ishami ry’uburezi mu Karere ka Ruhango na Ribanje Jean Pierre umukozi ushinzwe amashuri y’incuke n’abanza mu Karere ka Ruhango  bafungwa Imyaka itatu bakanatanga ihazabu y’Ibihumbi Frw 800.

Iyi myanzuro y’urubanza isomwe nyuma y’uko Kabalisa Emmanuel na mugenzi we bajuririye ikemezo cy’igifungo cy’imyaka itatu bari bahamijwe n’urukiko rwisumbuye rwa Muhanga muri Mata Umwaka ushize.

Rwasuzumye ibyo Niyomugabo Ereneste washinjaga aba bombi kwakira ruswa y’ibihumbi Frw 400 kugira ngo ahabwe akazi k’uburezi nta shingiro bifite.

Rwemeje ko imikirize y’urubanza rwaciwe n’Urukiko rwisumbuye rwa Muhanga Umwaka ushize ihindutse ariko ko rutegetse ko inyito y’ibyaha bihama abaregwa ihinduka aho kuba icyaha cyo gusaba, gutanga no kwakira indonke kugira ngo hakorwe umurimo, ahubwo cyaba icyaha cyo gutanga indonke kugira ngo hakorwe ikinyuranyije n’amategeko.

Ibi ngo nibyo byahamye  Niyomugabo Erenest ndetse n’icyaha  cyo gusaba no kwakira indonke kugira ngo  hakorwe ikinyuranyije n’amategeko gihama Kabalisa Emmanuel na Ribanje Jean Pierre.

Urukiko rutegetse ko  hagumishwaho igihano k’imyaka itatu y’igifungo  bagatanga n’ihazabu y’ibihumbi Frw 800, ibi bikaba bireba  Kabalisa Emmanuel na Ribanje Jean Pierre mu rubanza bajuririye.

Rutegetse  ko igihano cy’umwaka umwe cyahawe Niyomugabo Erenest kigumaho n’ihazabo y’ibihumbi Frw 800.

Urikiko rwategetse kandi ko hagumaho ingwate y’amagarama yatanzwe na Kabalisa na Ribanje ahwanye n’ibyakoreshejwe mu manza zabo mu rwego rw’ubujurire.

Niyomugabo Erenest akaba agomba kwishyura ahwanye n’Ibihumbi Frw 75 y’ibyakoreshejwe mu rubanza rwe ku rwego rw’ubujurire.

Mu rubanza rw’Urukiko rwisumbuye rwa Muhanga rwari rwarezwemo abakozi 3 b’Akarere bo mu Ishami ry’Uburezi uwitwa Gatete Egide we ntiyigeze ajurira.

Amakuru Umuseke wahawe n’abakozi bakoranaga avuga ko uyu Gatete yahise acika ubutabera.

Umuseke kandi ufite amakuru avuga ko Kabalisa Emmanuel na Ribanje Jean Pierre batagera ku kazi kuva isomwa ry’Urubanza ribaye.

Abo bakorana babwiye Umuseke ko na Telefone zabo ngendanwa bazihamagara ntizicemo.

MUHIZI Elisee
UMUSEKE.RW/Nyanza

3 Ibitekerezo

  • Gusa bazagere no mu Murenge igize akarere abakozi bamwe na bamwe rwose nabo sishyashya

    • Kabalisa ararenganye pe Imana izamurenganure kuko ubutabera nyabwo ni ubwayo

  • Akarere ka Ruhango karanze kabaye intanga Rugero rubi pe! gusa ibi byabaye muri aka karere birebwe no mutundi turere kuko nyuma yaho imirimo iri gutangwa inyuze kuri e-recrutment hari imirimo imwe nimwe itanyuraho, bigatuma bifasha abaryi ba ruswa.
    Hasuzumwe kandi imitangirwe ya Interview kuko uburyo zitangwamo nabwo ntago bunoze nagato rwose.
    Ibizamini bihabwa by’umwihariko abarimu kumyanya y’akazi hashakwe ukuntu byazajya bitegurwa na MINISTERIE Y’uburezi aho kuba akarere, cyangwa undi uwo ariwe wese.
    Imana ijya ifasha RIB mukazi ikora gakomeye.

Subiza

Your email address will not be published. Required fields are marked *