• 07/12/2019 11:35 05

Abagiraga ipfunwe ryo kujya kwiga bakuze ubu gusoma babyigira mu midugudu

Abaturage batari bazi gusoma, kwandika no kubara bo mu turere twa Gicumbi, Gakenke, Rulindo, Rutsiro, Ngororero, Huye na Gisagara bakaza gushyirwaho uburyo bwo kubibigisha binyuze mu bakorerabushake babasanga mu midugudu, barishimira urwego bagezeho kuko ubu bavuye mu bujiji.

Abakorerabushake bigisha abakuru banategura amarushanwa y'abana
Abakorerabushake bigisha abakuru banategura amarushanwa y’abana

Aba baturage bari baranze kugana ishuri kubera kugira ipfunwe ryo kuba bagerayo bakigana n’abo babyaye cyangwa buzukuruje, bavuga ko iyi gahunda yo kwigishwa n’abakorerabushake yabafashije ubu bakaba bari kugendana n’amajyambere.

Nyirazaninka Annonciatta utuye mu murenge wa Rubaya mu karere ka Gicumbi, afite imyaka 63, avuga ko abakorerabushake batangiye kubigisha muri 2013, ubu akaba yaramaze kumenya iby’ibanze.

Ngo kutamenya gusoma no kwandika biragatsindwa, ubu amaze kubona ibyiza byo kubimenya. Ati “Ubu no mu isoko ntibashobora kumpenda, iyo ntumye umwana guhaha mwandikira ibikoresho agura.”

Ndayambaje Benjamin ushinzwe amashuri y’inshuke n’abanza mu karere ka Gakenke avuga ko abakuru bakunze batigeze bagira amahirwe yo kugana ishuri, bakunze gutsikamirwa n’ipfunwe bakanga kujya mu ishuri kuko bumvaga ari igisebo kwigana n’abana babo.

Akavuga ko iyi gahunda y’abakorerabushake yatanze umusaruro ushimishije kuko umubare w’abatazi gusoma no kwandika ukomeje kugabanuka.

Ati “Ikibazo cyo kugira ipfunwe cyabonewe umuti.”

Abakorerabushake bigisha abakuze gusoma no kwandika, bajya bategura amarushanwa yo gusoma inkuru zanditse ku buryo iyi gahunda iri gutuma abantu batora umuco wo gusoma.

Avuga ko iyi gahunda iri kuzamura n’imyigire y’abana kuko basigaye bafashwa n’ababyeyi babo bamaze kujijuka.

Ati “Ababyeyi n’abana basigaye bafatanya kureba neza gukurikirana amasomo dutanga, kandi bose babyungukiramo.”

Abo mu karere ka Gicumbi bavuye mu bujiji bwo kutamenya gusoma no kwandika kubera iyi gahunda, bavuga ko bari barahombye byinshi kuko mbere bumvaga nta jambo bafite mu bandi ariko aho bamenyeye gusoma no kwandika basigaye biyumvamo icyubahiro nk’abandi bose.

Evence NGIRABATWARE
UM– USEKE.RW

Subiza

Your email address will not be published. Required fields are marked *