• 24/01/2020 12:55 01

Ababyeyi barakebura abibwira ko guhana umwana neza ari ukumukubita, ngo ‘inkoni ivuna igufwa…”

Hagiye hagaragara henshi aho ababyeyi bibwira ko gukubita umwana ari bwo buryo bwiza bwo ku murera, nyamara inkoni ababyeyi batandukanye bagaragaza ko atari yo muti mu burere bw’umwana, umuti mwiza bemeza ko ari ukuganiriza umwana aho kumukubita.

Guhana umwana si ngombwa inkoni n’amagambo mabi

Mu kiganiro cyabereye ku Itorero Christian Family Church International mu Murenge wa Kimisagara kuri iki cyumweru, ababyeyi n’abayobozi mu nzego zitandukanye barebeye hamwe ibijyanye no kurengera uburenganzira bw’umwana by’umwihariko mu burere butamuhutaza.

Kabayiza Ange yabwiye Umuseke ko umubyeyi akwiye guha uburere umwana we neza, mu gihe akosheje ntiyihutire kumukubita.

Ati “Nakuze iwacu tujya inama uburyo bwo kuduhana, nanjye niyo mpamvu umwana wange tuzajya tujya inama ku buryo bwo kumuhana, kuko twize ko inkoni ituna igufwa aho kuvuna ingeso.”

Kabayiza Ange avuga ko guhana ukababaza umwana atari byo byatuma umwana yikosora, ahubwo ngo ikiza ni ukubaza umwana impamvu yatumye akora ikosa ushaka kumuhanira.

Seraphin Irafasha umukozi wa AJPRODHO-JIJUKIRWA yavuze ko gukubita umwana ari byo benshi bakuriyemo ariko ngo si byo bikwiye kuko ngo igihe hatari ibyo umuntu ashoboye igisubizo si ukumukubita.

Ati “Icyo dukunze kwigisha ababyeyi ni uko gukubita umwana ari ukumuhohotera, kumwangiza, kuko gukubita ubwabyo ntabwo byemewe, ahubwo wakagombye kumenya icyatumye akora ikosa.”

Seraphin Irafasha avuga ko iyo wamenye ikosa umwana yakoze ukarikosora bituma atarisubiraho, bityo ngo ababyeyi barasabwa kudahora gusa mu guhana, ahubwo batekereze impamvu ituma ikosa riza, hanyuma barikosore.

Apotre David Kubwimana uyobora Itorero Christian Family Church International yavuze ko Yesu atarereshejwe inkoni, ndetse na Mose (uvuga muri Bibiliya) ngo mu burere yahawe ntabwo ababyeyi be bamukubitaga.

Ati “Ababyeyi barere abana batibanze mu kureresha inkoni, bibande mu kumutoza uburere bwiza binyuze mu biganiro ndetse mu busabane bafitanye nk’isano y’ababyeyi n’abana babo.”

Apotre David Kubwimana yakomeje avuga ko ababyeyi bakwiye kwita ku bana babyaye bakabatoza umuco n’ubupfura, no kubaha Imana.

Charles Havuguziga umuyobozi w’Umurenge wa Kimisagara avuga ko inkoni atari igisubizo mu burere bw’umwana.

Ati “Umwana akora ikosa ukamuganiriza, ukamwereka ikibi yakoze, ukamusaba ko atazongera kugikora. Umwana ushobora kumukubita uyu munsi akakubwira ko atazongera gukora ikosa nyuma akamera nk’aho umutumye kurikora, nyamara umuganirije ukamwereka ikibi kirimo ubutaha ntabwo yongera.”

Charles Havuguziga yakomeje avuga ko imvugo mbi ku mwana na yo atari yo, ngo umwana araganirizwa.

Daddy Sadiki RUBANGURA
UMUSEKE.RW

Subiza

Your email address will not be published. Required fields are marked *