• 11/12/2019 12:59 36

2018: Muri Paroisse 10/31 zagenzuwe, Caritas ya Kigali yasanze abakobwa 2896 barabyariye iwabo

Umuryango ushamikiye kuri Kiliziya ukaba ufasha abababaye Caritas/Kigali, usaba Abanyarwanda kwitabira gufasha bahereye kuri bene wabo bafite ibibazo bikomeye by’imibereho, mu bo basanze bahangayikishije cyane harimo n’abana b’abakobwa baterwa inda badafite uburyo bwo kwita ku bana bazabyara.  Ubugenzuzi Caritas Rwanda yakoze i Kigali honyine, yasanze muri Paruwasi 10 muri 31 zigize Archidiyoseze ya Kigali abakobwa 2 896 barabyariye iwabo.

Umuyobozi wa Caritas/Kigali Padiri Donatien Twizeyumuremyi avuga ko umuco wo gufasha abababaye ukwiye kwimakazwa

Kuri uyu wa kabiri tariki 6 Kanama, 2019 uyu muryango waganiriye n’abanyamakuru ugaragaza ko ukeneye nibura miliyoni 40Frw muri uku kwezi k’urukundo n’impuhwe (muri Kiliziya Gatolika ni gahunda iba mu kwezi kwa Munani) kugira ngo babashe kwita ku bantu bababaye barimo na bariya bakobwa.

Abo bakobwa babyariye iwabo bafite muri rusange abana 3992, Caritas/Kigali ivuga ko bakeneye ubufasha burimo kongera kwiremamo ubushobozi burambye n’ikizere.

Caritas/Kigali ivuga ko icyo ari kibazo gihangaykishije gikwiye guhagurukira ariko n’abo bantu bakabona inkunga kugira ngo bamwe bashakirwe amashuri y’imyuga.

Mu kwezi k’urukundo n’impuhwe kuba mu kwezi kwa Munani, Caritas/Kigali isaba Abanyarwanda kuzirikana abatishoboye barimo n’abariya bana bavuka ku babyeyi na bo bakeneye kurerwa ndeste n’abandi bazahajwe n’ibyago nk’impunzi, n’abana bo ku muhanda.

Uyu muryango uvuga ko bikwiye ko buri Munyarwanda yiyemeza kugira uruhare mu gufasha abazahajwe n’ibiza, intambara ndetse n’ibindi bibazo bidateguza, ngo kuko mbere y’uko habaho gutabaza amahanga abantu bagomba kubanza gutabarana ubwabo.

Umuyobozi wa Caritas/Kigali, Padiri Donatien Twizeyumuremyi avuga ko muri uku kwezi k’urukundo n’impuhwe abantu baba bakwiye kwigiramo kugira umutima ufasha abandi ariko bagahera ku baturanyi mbere y’uko bafasha abo batazi.

Avuga ko umuco wo gufasha abababaye ugomba kwimakazwa kugira ngo abaturage bafatanye mu kuzahura imibereho y’abababaye babagenera inkunga y’amafaranga cyangwa ikindi gikoresho, mu rwego rwo kububakira ikizere kirambye.

Ati “Uwo iyi nkunga ihawe uyu munsi tuba twifuza ko na we ejo yazaba yifashije. Birakwiye ko duhagurukira hamwe kugira ngo dufashe abababaye kwifasha.”

Narame Grace ushinzwe guhuza ibikorwa byo gufasha abatishoboye avuga ko ibikorwa by’urukundo bikwiye kuranga buri Munyarwanda by’umwihariko Abakirisitu Gatulika kuko urukundo rw’Imana rugaragarira mu buryo ubana na bagenzi bawe.

Ati “Uzagaragaza ko ukunda Imana igihe uzabona mugenzi wawe afite ikibazo ugafata iya mbere mu kumufasha kugikemura. Tugomba kuzirikana ko umukene ari uwacu mbere y’uko aba uw’Abazungu. Mbere yo gutabaza amahanga tugomba kubanza gutabarana ubwacu.”

Avuga ko ku bufatanye bwa buri wese nta rwitwazo rwo kumva ko utafasha ahubwo ko buri wese abigize ibye hari uruhare yagira mu kugarurira ikizere abatishoboye bababaye.

Agaragaza ko mu gufasha abakene n’abatishoboye nta kurobanura kugomba kubamo hashingiwe ku idini runaka, ururimi, amoko, ibara ry’uruhu cyangwa inkomoko.

Muri iyi gahunda y’ukwezi k’urukundo n’impuhwe, uyu mwaka wa 2019 hari intego yo gukusanya inkunga ingana na miliyoni 40Frw, ngo yafashwe kuko ubushize ari yo bari bihaye ntibabasha kugeza kuri ayo mafaranga.

Igihe yaba abonetse azavamo miliyoni 10Frw yo gufasha abakobwa bagera kuri 300 muri bariya babyariye iwabo kwiga imyuga.

Miliyoni 12Frw azakoreshwa mu gufasha abana bo ku muhanda biga amashuri abanza bagera ku 169, n’abiga ayisumbuye bagera kuri 53.

Amafaranga miliyoni 10 azahabwa abanyeshuri bakennye, mu gihe miliyoni eshanu zizatangwa nk’ingoboka ku bandi batishoboye.

Imibare itangwa na Raporo y’umwaka wa 2018 mu gikorwa nk’iki cy’ukwezi k’urukundo n’impuhwe, igaragaza ko habonetse muri rusange inkunga ifite agaciro ka Frw 111 584 568 (habazwe amafaranga miliyoni 28Frw cashi, kongeraho inkunga y’ibiribwa, imyambaro n’ibindi bikoresho).

Caritas/Kigali yari yihaye intego mu mwaka ushize yo kubona miliyoni 40Frw cashi mu mwaka wa 2018, ariko yabonye ariya miliyoni 28Frw gusa ari na yo mpamvu muri uyu mwaka bifuza kugera kuri uriya muhigo wa miliyoni 40Frw cashi bitewe n’ibibazo bihari.

Caritas/Kigali muri 2018 muri rusange yakoresheje ingengo y’imari ya Frw 407 871 513  afasha abantu batandukanye bagera ku 40 932 bose hamwe, barimo abafite ubumuga, abageze mu zabukuru, imfungwa n’abagororwa, abana bo mu miryango itishoboye 3031 n’abandi.

Mu bikorwa byo gufasha gusa, impunzi n’abandi bahuye n’ibiza Caritas/Kigali yakoresheje agera kuri miliyoni 86,7Frw muri ariya miliyoni 407,8Frw yakoreshejwe mu mwaka ushize.

Imibare ya Ministeri y’Uburimganire n’Iterambere ry’Umuryango MIGEPROF, igaragaza ko muri mwaka wa 2016 abakobwa bagera ku 17 500 bari hagati y’imyaka 16-19 batewe inda zitateganijwe, bamwe bikabaviramo gucikiriza amashuri.

Dieudonne NSHIMIYIMANA wimenyereza umwuga/UMUSEKE.RW

4 Ibitekerezo

  • Caritas irigiza nkana. Kiriziya yanga ikoreshwa ry’agakungirizo yarangiza ngo abana baratwise barabyara. Kwigisha ubuzima bw’imyororokere byonyine ntibigagije.

    Caritas irigiza nkana.

  • Umutwe w’iyi nkuru ntaho uhuriye n’igitekerezo nyamukuru cyayo. Wari kugira uti:”Caritas ya Kigali irashishikariza abakirisitu gutanga inkunga yo gufasha abatishoboye muri uku kwezi kw’impuhwe kwa munani”. Ubwo inkuru yari kujya mu gika cyamamaza (ukaboneraho ukanishyuza n’iyo service). Naho ubundi rwose uradutuburiye, nta kintu kigaragara utubwiye kuri kariya kaga k’abakobwa bagera ku 2900 babyariye iwabo abana basaga 3900 (Muri rusange buri mukobwa afite umwana urenga umwe, byumvikane ko igiti kitagukora mu jisho kabiri keretse iyo ufite ubumuga bwo kutabona!).

  • Caritas mwakoze ku bushakashati mwakoze. Iki kibazo kirakomeye kandi ingaruka zacyo ni nyinhshi cyane ku bana bavuka n’ababyeyi babo ndetse na societe yose. Buri wese akore icyo ashoboye mu kubagoboka no kubikumira . Imiryango ndavuga ababyeyi bashyireho akabo mu burere bw’umwana w’umukobwa kurushaho kumuba hafi no kumuganiriza naho ubundi ntabwo bizagarukira hafi aha.
    Udukingirizo nta gisubizo kirambye mbonamo. Umutimanama wamaze gupfa, ni ukurwana n’ingaruka si ugukumira .

  • Ni byiza cyane rwose, Caritas ya Kigali turayishimira ibikorwa byiza ikomeje gukorera abanyarwanda ndetse n’abandi bantu benshi bari mu kaga gatandukanye, ni ukuri buri muntu wese yagombye kugira umutima wita kuri abo, abagize amahirwe yo kugira icyo baronka bakibuka abo bababaye badafite na mba bityo ibikorwa bya bo bikabagirira akamaro kandi Imana ikazabibahembera. Kuvuga ngo Caritas irigiza nkana rwose ntabwo tubyumva kimwe muvandimwe kuko kudakoresha agakingirizo no gutwara inda imburagihe ntaho mbona bihuriye. icy’ingenzi ni uburere buhabwa abo bana, kubaba hafi ndetse no kubigisha. Umwanditsi w’iyi nkuru cyakora byo bishoboka yahindura umutwe wa yo, bikajyana neza n’ibiyikubiyemo, cyane cyane ko ivuga ku kwezi k’urukundo n’impuhwe.

Subiza

Your email address will not be published. Required fields are marked *