REG BBC ngo iratwara Pre-season tournament yemeze abakunzi ba Basket – UMUSEKE

REG BBC ngo iratwara Pre-season tournament yemeze abakunzi ba Basket

Hasigaye igihe gito shampionat ya Basketball igatangira, ikipe nshya ubu iri kuvugwa cyane ni REG Basketball Club, iyi kipe ubu igeze ku mukino wa Pre-season Tournament, intego ngo ni ugutsinda Patriots ikemeza abagishidikanya ko ari ikipe itangiranye imbaraga.

Ikipe ya REG yifuza kwegukana igikombe cya Preseason

Ikipe ya REG yifuza kwegukana igikombe cya Preseason

Kuwa gatanu tariki 25 Ugushyingo nibwo iri rushanwa rizasozwa, Patriots ikiba na REG, ikipe nshya y’ikigo cy’igihugu gishinzwe ingufu nayo isa n’izanye ingufu zidasanzwe.

Uyu mukino urahuza abatoza basanzwe n’ubunid bajya bahangana; John Bahufite wavuye muri Espoir BBC ubu utoza REG BBC, wahuye kenshi n’umunya-Tanzania Henry Muhenuka utoza Patriots BBC.

John Bahufite yabwiye Umuseke ko yifuza gutangira umwaka w’imikino ahesha ikipe ye nshya igikombe, kuko bizamura ikizere ku bayobozi bayishyizeho.

Bahufite yagize ati: “Turifuza kwegukana igikombe, turabizi ko gutsinda Patriots BBC bitoroshye kuko turi ikipe nshya itaramenyerana kandi igifite byinshi byo gukosora. Gusa biranashoboka kuko benshi mu bakinnyi mfite bafite inararibonye, kandi bagiye bakinana. nizeye ko kumenyerana bitazafata igihe kinini.

Icy’ingenzi kurushaho ni ugutuma abayobozi bacu babona ko gushinga ikipe batibeshye, kuko ishobora guhagararira ikigo cya REG neza.”

Uyu mutoza aravuga ibi yizeye abakinnyi bafite amazina akomeye barimo n’abo yakuye muri Patriots, nk’uwahoze ari kapiteni wayo Ally Kubwimana Kazingufu na Kaje Elie bavuye muri Patriots BBC.

REG kandi ifite Shyaka Olivier, Ngandu Bienvenu na Benjamin Bokofi bakiniraga Espoir, Regis Gatoto wakiniraga UGB, na Nkurunziza Déo wakiniraga APR BBC.

REG BBC yageze ku mukino wa nyuma isezereye Espoir BBC, iyitsinze 67-56, naho Patriots BBC yatsinze APR BBC 58-47 mu mikino ya 1/2.

Umukino uzabera kuri petit stade Amahoro, kuwa gatanu, saa 18h.

REG ubu ifite umwe mu ba-pivot bakomeye mu Rwanda Ngandu Bienvenue bita Jobu (hagati mu ifoto)

REG ubu ifite umwe mu ba-pivot bakomeye mu Rwanda Ngandu Bienvenue bita Jobu (hagati mu ifoto)

Bahufite utoza REG yahize gutsinda Patriots kuwa gatanu

Bahufite utoza REG yahize gutsinda Patriots kuwa gatanu

Patriots niyo ifite igikombe cya shampionat umwaka ushize

Patriots niyo ifite igikombe cya shampionat y’umwaka ushize

Roben NGABO
UMUSEKE.RW

Likes(0)Dislikes(0)

Ibitekerezo

Your email address will not be published. Required fields are marked *