Mu myaka 10 ishize, 2015 uri mu yahitanye abanyamakuru benshi – UMUSEKE

Mu myaka 10 ishize, 2015 uri mu yahitanye abanyamakuru benshi

Raporo y’ishami ry’umuryango w’abibumbye ryita ku muco (UNESCO), ivuga ku mibereho y’abanyamakuru n’ihohoterwa bakorerwa, igaragaza ko umwaka wa 2015 wabaye umwaka mubi ku banyamakuru ku Isi hose kuko ngo ni uwa kabiri mu myaka yapfuyemo abanyamakuru benshi mu gihe cy’imyaka 10 ishize.

Abanyamakuru bapfa buri mwaka bariyongera

Abanyamakuru bapfa buri mwaka bariyongera

Mu myika ya 2014 na 2015 yatwaye abanyamakuru 213 ku Isi, 2015 wonyine watwaye ubuzima bw’abanyamakuru 115 aho wahise uza ku mwanya wa kabiri mu myaka yahitanye abanyamakuru benshi mu myaka 10 ishize.

Abanyamakuru benshi bagiye bagwa mu mvururu zabaga mu bihugu byabo.

Ibihugu by’Abarabu biza imbere mu gupfusha abanyamakuru benshi aho mu mwaka wa 2015 byiharira 37%. Naho mu 2014 byiharira 41% y’abanyamakuru bapfuye.

Muri ibi bihugu, muri iyi myaka ibiri bapfushije abanyamakuru 78 muri  213 bapfuye ku Isi hose. Umugabane wa Afurika uza ku mwanya wa kane muri iyi myaka ibiri n’abanyamakuru 27 bapfuye.

Afurika ariko mu mwaka ushize wa 2105 abanyamakuru bapfuye bariyongereye ugereranyije n’umwaka wa 2104 aho bavuye kuri 11 bagera kuri 16 muri 2015.

Abanyamakuru b’igitsina gabo ni bo bishwe cyane muri iyi myaka kuko muri 213 bishwe muri iyi myaka, 195 bose bari ab’igitsina gabo mu gihe ab’igitsina gore bari 18 gusa.

Mu myaka ya kera abanyamakuru b’ibinyamakuru byandika ku mpapuro ni bo bibasirwaga cyane, muri iyi myaka ho abanyamakuru ba za televiziyo n’ab’ibinyamakuru byandika kuri Internet ni bo bibasiwe.

Iyi raporo kandi yagaragaje ko abanyamakuru bishwe, 90% yabo babaga ari abakorera ibitangazamakuru byabo mu bihugu byabo atari mpuzamahanga.

Abanyamakuru bigenga n’abanyamakuru b’abaturage (citizen Journalists) iyi raporo ivuga ko bari mu bishwe cyane muri iyi myaka kuko abishwe bo muri icyo cyiciro ari 18% by’abishwe bose.

Muri iyi myaka yombi ibihugu byiciwemo abanyamakuru benshi ni ibihugu birimo imidugarararo ndetse n’imitwe yitwaje intwaro. Ibihugu bya Syria, Somalia n’ibindi byo mu Barabu biri imbere mu byaguyemo abanyamakuru benshi.

Somalia nka kimwe mu bihugu bimaze igihe kirekire mu mvururu, ni kimwe mu bihugu abanyamakuru baba bari mu kaga kurusha ibindi ku Isi. Kuva mu 2006 kugeza 2015 hamaze kugwa abanyamakuru 56 bose.

CalixteNDUWAYO
UMUSEKE.RW

Likes(1)Dislikes(0)

3 Comments

  1. Barabara

    November 3, 2016 at 7:40 am

    Mu Rwanda duhagaze neza. Abanyamakuru ntabwo bakivuga ibyashyira ubuzima bwabo mu kaga, nta kibazo bagifite. Abo bakigeramiwe hirya no hino ku isi, bajye baza mu ngendo shuri tubigishe uko autocensure ikora neza. Nibashaka kuzamura ijwi, bajye bavuga ku by'amadini, sport, umuziki, imyidagaduro, impanuka zo ku mihanda, ibiyobyabwenge mu rubyiruko, n'ibindi nk'ibyo bitarimo politiki.

    Likes(0)Dislikes(0)
  2. bigabo

    November 3, 2016 at 9:16 am

    Abanyamakuru bishyize imbere nk'akarenge karwaye umufunzo, mwumva mwaremewe gutura nka Mont Kigali !

    Likes(0)Dislikes(0)
  3. Nzirasanaho

    November 3, 2016 at 11:40 am

    Nta kundi mu Rwanda ni Sport, umuziki, n'ibindi bitagira politiki mama weee, kuko burya ngo ntawe utinya ishyamba atinya icyo barihuriyemo sha!

    Likes(0)Dislikes(0)

Ibitekerezo

Your email address will not be published. Required fields are marked *